جلابی دیر ءِ رکھ کننگ کن ’’ریچارج پاکستان ‘‘ ڈٹ اس تیار کننگ انگ ءِ، زرتاج گل

اسلام آباد ۔ 20 دسمبر (اے پی پی) وزیر مملکت موسمیاتی بدلی زرتاج گل موسمیاتی بدلی و چاگڑدی کچٹی نا مون ءِ توننگ و لس بندغ نا زند انا آب ءِ گچین کننگ نا حکومتی عزم انا درشانی ءِ کرسا پارے کہ جلابی دیر ءِ رکھ کننگ کن وزارت موسمیاتی بدلی ’’ریچارج پاکستان‘‘ ڈٹ اسے آ کاریم نا بناءِ کرینے دا ڈٹ انا رداٹ خاص وڑاٹ سندھ و بلوچستان اٹی جوان انگا ہند آتیا بھلو تلاپ تفنگک ہراڑان نئے بیرہ ڈغار اٹی دیر انا کچ ءِ بڑز مننگ اٹ کمک رسینگک بلکن فصل آتا دسنگ کن ہم دیر دوئی مریک ۔ داخیال آتا درشانی ءِ او ’’اے پی پی‘‘ ہیڈ کوارٹرز نا دورہ ءِ کننگ نا وخت آ پینل انٹرویو ٹی کرے ۔ اومستی پارے کہ ہاءوسنگ سوساءٹیز ءِ دا ہیت انا پابند کینہ کہ او پارک آتے کن جتا کروک آ جاگہ ءِ پین مسخت اسے کن کاریم اٹ اتپ، پاکستان تحریک انصاف نا حکومت برسراقتدار بننگ آن پد غٹ آن زیات چکار بے پرخ احتساب، چاگڑدی کچٹی نا مون ءِ توننگ و الس نا زند انا آب ءِ بڑز کننگ کن احساس پروگرام آ کرینے ۔ حکومت کبینی نا مون ءِ توننگ کن ہلہلئی بنداو تیا گام گیج کننگ ءِ ۔ زرتاج گل پارے کہ ملک اٹی جلابی دیر ءِ رکھ کننگ کن بنجائی و صوبائی حکومت آتے بھلا ڈٹ آتیا کاریم کننگ نا گرج ءِ دا مسخت کن وزارت موسمیاتی بدلی ’’ریچارج پاکستان‘‘ ڈٹ اس بناکننگ والا ءِ و وزیراعظم عمران خان دا ڈٹ انا سمری ءِ منظور کرینے ۔ اوپارے کہ ریچارج پاکستان ڈٹ انا رداٹ سندھ و بلوچستان اٹی جوان انگا ہند آتیا بھلو تلاپ جوڑ کننگک ہراڑان نئے بیرہ ڈغار اٹی دیر انا کچ ءِ بڑز مننگ اٹ کمک رسینگک بلکن فصل آتا دسنگ اٹ ہم کمکاری مریک ، دا ڈٹ اکن ای پاکستان اٹی یورپین یونین نا سفیر تون ہم ہیت کریٹ اودا ڈٹ انا ستاءِ کرے و ہروڑ کمکاری نا باوری کرفے ، داکان بیدس گلوبل کلائمیٹ فنڈ ہم دا بابت مالی کمکاری کیک ۔ اوپارے کہ حکومت کبینی نا مون ءِ توننگ کن جامع حکمت عملی اسے نا رداٹ گام گیج کننگ ءِ و دا بابت یوٹیلٹی اسٹور آتے 6 ارب روپئی جاری کننگانے تانکہ لس بندغ کن کنوئی آ گڑاتا اڑزان نہاد آ دستیابی ءِ پک کننگ مرے ۔ اوپارے کہ پاکستان موسمیاتی بدلی تیان زیات زہمی مروک آ 10 ملک آتے ٹی اوار ءِ و بی بی سی نا رپورٹ نا رداٹ ننا ملک انا 60 درسد الس موسمیاتی بدلی تا منفی اثرآتیان لاعلم ءُ ۔ ننا وزارت چنکو وخت اسے ٹی دابابت نئے بیرہ الس اٹی آگاہی ودی کرینے بلکن وزیراعظم عمران خان نا ویژن نا رداٹ بلین ٹری سونامی ، کلین اینڈ گرین پاکستان ڈٹ آتیان بیدس بنجائی دارالحکومت اٹی پلاسٹک نا شاپنگ بیگ آتیا پابندی خلکونے ۔ وزیر مملکت پارے کہ درخت آتا کاٹ کننگ ءِ توننگ کن گلگت ، بلتستان و بلوچستان اٹی کم توانائی آن چلینگوک 10 ہزار چولہا بشخک ۔ اوپارے کہ بھٹہ غاتیان ودی مروک آ کچٹی نا مون ءِ توننگ کن زیگ زیگ ٹیکنالوجی آ گدریفنگ انگ ءِ ہراڑان بھٹہ غاتیان ودی مروک آ 80 درسد کچٹی ءِ کم کننگ اٹ کمک رسینگک ۔ اوپارے کہ ڈیرہ غازی خان ڈویژن اٹی جلابی دیر ءِ کوڑی کننگ و بجلی ودی کننگ کن 3چنکو ڈیم جوڑ کننگک ۔