سعودی عرب نا وزارت امور اسلامیہ، دعوہ و رہنمائی و انٹرنیشنل اسلامک یونیورسٹی نا تین پہ تینی کمکاری ٹی پین ودکی نا فیصلہ

اسلام آباد ۔ 20 دسمبر (اے پی پی) سعودی عرب نا وزارت امور اسلامیہ ، دعوہ و رہنمائی و انٹرنیشنل اسلامک یونیورسٹی تین پہ تینی کمکاری ٹی پین ودکی نا فیصلہ کرینو ۔ ہڑتوم آ ادارہ غاتا نیام اٹ دا فیصلہ سعودی وزارت نا اسہ ڈل و انٹرنیشنل اسلامک یونیورسٹی نا صدر پروفیسر ڈاکٹر احمد یوسف احمد الدرویش نا نیام اٹ اوڑدہی ٹی مس ۔ سعودی ڈل انا کماشی ءِ وزارت نا اسہ سینئر راہشون پروفیسر صالح النصیف کریکہ ۔ اسلامک یونیورسٹی نا دورہ ءِ کننگ نا وخت آ ڈل صدر جامعہ تون اوڑدہی کرے و فیصلہ کرے کہ ہڑتوم آ ادارہ غاک تعلیمی و ہیل کاری بشخ آتے ٹی تین پہ تینی کمکاری ٹی پین ودکی کیرہ تانکہ امت مسلمہ نا پوسکن آ چین تے پوسکن آ دور انا چیلنج آتون مون تننگ کن تیار کننگ مرے ۔ ڈل انا سروک پروفیسر صالح النصیف دا وخت آ پارے کہ علم ہی حقی سرمایہ ءِ ، داڑکن عالم و دانشورآتا دا زمواری ءِ کہ دنیا ءِ انتہاپسندی و منفی رویہ غاتیان بچفنگ کن تینا کڑدءِ ادا کیر ۔ اوپارے کہ پاکستان و سعودی عالم دینک دا چرجوئی ٹی تینا زمواری تے سچا انگا نیت اٹ ادا کرسا کیرہ ۔ صالح النصیف پارے کہ پاکستان و سعودی عرب نا نیام اٹ تعلقداری ٹی ہر گدرینگوک آ دے اتون سوگوی و ودکی برسا کننگ ءِ ہرا انسانیت نا اسہ نہادی ءُ میرات اسے ۔ اوپارے کہ سعودی الس نا است اٹ پاکستانی الس کن بھلو شرف و مہر و مریبت اسے ، تین پہ تینی کمکاری ٹی ودکی اتون ہرادے پین ودفنگ مریک ۔ انٹرنیشنل اسلامک یونیورسٹی نا صدر پروفیسر ڈاکٹر احمد یوسف احمد الدرویش داوخت آ پارے کہ اونا ادارہ اسلام نا حقی کلہو ءِ تالان کننگ کن سچا انگا نیت اٹ کاریم کننگ ءِ، و دا ادارہ غان فارغ مروک آ ورناک بیرہ پاکستان آخا بلکن دنیا ٹی بھلو خذمت اس انجام تننگ ءُ ۔ سعودی ڈل جامعہ نا چندی بشخ آتا دورہ ءِ کرے ۔ داوخت آ اسہ ایلو ءِ ٹیکی ہم تسر ۔