چیئرمین سینیٹ محمد صادق سنجرانی نا مسکوہی صوبائی وزیر ثناء اللہ نا مسڑ نا برام نا دود اٹی سرکڑدہ غاتا ڈل اتون گپ و تران

اسلام آباد ۔ 20 دسمبر (اے پی پی) چیئرمین سینیٹ محمد صادق سنجرانی پارینے کہ سوگو صوبہ سوگو بنجا نا نشانی ءِ و دا چرجوئی ٹی ایوان بالا نا کڑد مرکزی ءُ حیثیت اس تخک ہراکہ بنجا ٹی صوبہ غاتا حق اکن تواربڑز کیک ۔ سینیٹ سیکرٹریٹ نا رداٹ چیئرمین سینیٹ صادق سنجرانی داخیال آتا درشانی ءِ پشاور اٹی قبائلی علاقہ و مسکوہی فاٹا نا سرکڑدہ غاتا ڈل اتون اسہ نشست اسے ٹی کرے ۔ چیئرمین سینیٹ نا مسکوہی صوبائی وزیر ثناء اللہ نا مسڑ نا برام نا دود اٹی خصوصی بشخ ہلنگ کن پشاور آ سرمس ہراڑے او سرکڑدہ غاتا ڈل اتون گپ و ترا ن کرے ۔ اوڑدہی ٹی ڈپٹی اسپیکر قاسم سوری، قائد ایوان شبلی فراز، سینیٹر سجاد طوری، سینیٹر احمد خان و سینیٹر اورنگزیب، سینیٹر مومن خان آفریدی، سینیٹر فدا محمد، بلوچستان عوامی پارٹی نا چیف شاہ جی گل آفریدی و پارلیمانی لیڈر خیبر پختونخوا اسمبلی ایم پی اے بلاول آفریدی ئسک ہم ساڑی ئسر ۔ اوپارے کہ مسکوہی فاٹا نا ضلع غاتے ٹی شونداری عمل ءِ ترند کننگ نا گرج ءِ تانکہ الس نا ویل آک ایسر مریر و اوفتے شونداری نا مرکزی دنگ اٹ اتنگ مرے ۔ اوپارے کہ سینیٹ نا کمیٹیک گچین وڑاٹ السی اہمیت نا ویل آتے ایسر کننگ اٹ اختہ ءُ و ایوان بالا بنجا نا ایوان نا وڑاٹ تینا آئینی و کانودی کڑد ءِ ادا کرسا کیک ۔