اسلام آباد۔ 16 فروری (اے پی پی) صدر مملکت ممنون حسین سیاسی کارندہ غاتیا زور شاغانے کہ او لس خلقت تون باقاعدگی اٹ رابطہ تخر ، اوداپت انا درشانی ئِ کرے کہ سیاسی کارندہ غاک خلقت نا ویل آتا ایسری خاص کر کنوئی آ صاف دیر، جان جوڑی نا آسراتی و تعلیم نا معیار نا فراوانی کن غٹ تر کوشست آتے کیرہ۔ صدر داہیت ئِ ملتان آن صوبائی اسمبلی نا باسک آتا اسہ ڈ ل اسے تون ہیت وگپ کرسا پارے ہراک پنچ شنبے آ داڑے ایوان صدر اٹی اوڑتون اوڑدہی کریر۔ ڈل انا سروکی ئِ ایم پی اے رانا محمودالحسن کریکہ۔ صدر پارے کہ سیاسی کارندہ غاتا زمواری مریک کہ اوالس ئِ ملک انا حقی حالیت آتیان معلومدار تخر و غیر سنجیدہ و غیر زموار عنصر آتے بے نقاب کیر۔ اوپارے کہ سیاسی کارندہ غاتے الس اٹی بدعنوانی نا لعنت نا چٹفنگ کن شعور ودی کروئی مرے۔ اوخلقت آتون پارے کہ او قومی ویل آتا رکھ اکن یکجا مریر۔ صدر ممنون حسین میوہ و فصل آتون اوار کشاری پیداوار اٹی ودکی کن پوسکن آ ٹیکنالوجی نا کاریم اٹ اتنگ نا گرج آ زورشاغا و داہیت انا ستائِ کرے کہ گچین پراسیسنگ و بے کچ معیاری امب آتا پیداوار نا سوب امب آتا برآمد آتیٹی ودکی مسنے۔ صدر پارے کہ پیداوار اٹی ودکی کن کشاری فصل آتا زیان ئِ کم آن کم کننگ کن پوسکن ئُ ٹیکنالوجی و تیکنک کاریم اٹ اتنگے۔ ڈل صوبائی اسمبلی نا باسک ملک مظہر عباس رانا، رائے منصب علی خان، رانا طاہر شبیر، سلطانہ شاہین ، رانا شاہد الحسن و مسکوہی ڈپٹی میئر ملتان محمد نعیم رفیق آ تالان ئس۔
