وفاقی وزیر احسن اقبال ءَ ازبکستان ءِ سفیر علی شیر تختائیف ءَ گوں گند ءُ نند کتگ، جتا جتائیں پڑاں دو نیمگی کمک ءَ را گیش دیمروئی دیگ ءِ اوست ءِ سر ءَ گپ ءُ تران

اسلام آباد۔23جون  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوں پاکستان ءَ جمہوریہ ازبکستان ءِ سفیر علی شیر تختائیف ءَ گند ءُ نند کت۔ گند ءُ نند ءِ ساھت ءَ دوئیں نیمگ ءَ وانگ ءُ زانگ، تجارت، معیشت، ٹرانسپورٹ ءُ کمیونیکیشن، کشت ءُ کشار ءُ لائیو سٹاک ءِ دیمروئی ءِ شوبگ آنی تہ ءَ دو نیمگی کمک ءَ را گیش دیمروئی دیگ ءِ گامگیج آنی سر ءَ ھیال ریچی کنگ بوت۔ گپ ءُ تران ءَ پاکستان ءُ ازبکستان ءِ نیام ءَ اسٹریٹجک شریکداری ءَ را مھکم کنگ، دمگی رابطہ ءَ را گیش کنگ ءُ اقتصادی یکوئی ءَ را دیمروئی دیگ ءِ واستہ یکجائی جزم ءِ  درشان  کنگ بوت۔ دوئیں ملک آنی نیمگ ءَ یکجائی پٹ ءُ پولی منصوبگ، نودربر ءُ اساتذہ ءِ تبادلہ ءِ پروگرام، ھاسیں ازم  سازی ءُ تربیت ءِ گامگیج آنی وسیلگ ءَ وانگ ءُ زانگ ءِ کمک ءَ را گیش کنگ ءِ موہ آناں ھم چار ءُ تپاسی کتگ۔ اے موہ ءِ سر ءَ وانگ ءُ زانگ ءِ کوالٹی ءَ را گیش گہتر کنگ ءُ وانگ ءُ زانگ ءِ سرٹیفکیٹ آنی میاں اوستمانی منگ ءَ را گیش کنگ ءِ واستہ ڈگری پروگرام آنی یکجائی اعتبار ءِ امکان ءِ سر ءَ ھم گپ ءُ تران کنگ بوت۔ وفاقی وزیر احسن اقبال ءَ وانگ ءُ زانگ ءِ کمک ءِ بابت ءَ گپ ءُ تران کنان ءَ زبان آنی دیمروئی ءُ علمی تبادلہ ءِ سر ءَ زور پر دات۔ آئی ءَ گوشت کہ ازبکستان پاکستانی نودربر ءُ پٹ ءُ پولکار آنی واستہ یک ھاسیں منزل ءِ رنگ ءَ ثابت بوت کنت کہ آ روسی زبان ءِ وانگ ءِ واھشت دار اَنت ایشی ءَ چہ آھاں دمگ ءِ سائنسی، تکنیکی ءُ پٹ ءُ پولی وسیلگ آناں جوانیں رنگ ءَ رسائی رس ایت۔ گند ءُ نند ءَ روحانی ءُ تعلیمی شوبگ ءَ پیشرفت ءِ سر ءَ ھم ھیال ریچی کنگ بوت۔ وفاقی وزیر ءَ ازبکستان ءِ اسلامی میراث ءِ رکھینگ ءُ دیمروئی ءِ ھاتر ءَ کوشست آناں ھاسیں رنگ ءَ سمرقند ءَ بحال بوتگیں امام بخاری کمپلیکس ءُ تاشقند ءَ اسلامی تہذیب ءِ مرکز ءِ وڑیں منصوبگ آناں ساڑات۔ آئی ءَ گوشت کہ اے گامگیج آنی تہ ءَ پاکستان ءَ ھم مزنیں دلگوشی ودی بوتگ ءُ دود ءُ ربیدگی ءُ وانگ ءُ زانگی کمک ءِ واستہ نوکیں موہ ھم رست اَنت۔ دوئیں نیمگ ءَ ظہور الدین محمد بابر ءِ زند ءُ ازمت آنی سر ءَ یکجائی ءَ یک کثیر اپسوز ءِ راجدپتری ڈرامہ ءِ جوڑ کنگ ءِ امکان ءِ سر ءَ ھم گپ ءُ تران کنگ بوت کہ ایشی ءِ مول ءُ مراد دمگ ءِ یکجائی راجدپتری ءُ دود ءُ ربیدگی ورثہ ءَ را پدر کنگ اِنت۔ وفاقی وزیر ءَ ازبکستان ءِ گوما پاکستان ءِ مھکمیں سیادی ءِ سر ءَ زور پر دات ءُ آئی ءَ را وتی دومی وطن ءُ میاں اوستمانی ایشیا ءَ پاکستان ءِ ھاسیں شریک آنی تہ ءَ یکے گوشت۔ آئی ءَ دوئیں ملک آنی نیام ءَ جہلیں راجدپتری، دود ءُ ربیدگی ءُ مردمی سیادی ءِ بابت ءَ گپ جتگ ءُ جتاجتائیں شوبگ آنی تہ ءَ وت مہ وتی کمک ءَ را گیش پراھی کنگ ءِ واھشت ءِ درشان کتگ۔ دیوان ءَ بالی رابطہ ءِ دیمروئی ءِ سر ءَ ھم چار ءُ تپاسی کنگ بوت، ایشی ءِ تہ ءَ تاشقند لاہور ءِ بالی گراب ءَ را گیش کارآمد جوڑ کنگ ءُ کراچی ءَ چہ ازبکستان ءِ ھاسیں شہر آنی تہ ءَ براہ راست بالی گراب آنی بندات کنگ ءِ تجویز آنی سر ءَ تران کنگ بوت تانکہ سیل ءُ سواد، تجارت ءُ مردم آنی نیام ءَ مردم آنی رابطہ آنی دیمروئی بہ بیت۔ ازبکستان ءِ سفیر علیشر تختائیف ءَ دمگ ءَ امن ءُ ایمنی ءِ دیمروئی ءِ تہ ءَ پاکستان ءِ جوڑیشت ءِ کرد ءَ را ساڑات ءُ مزن وزیر شہباز شریف، فیلڈ مارشل سید عاصم منیر ءُ پاکستان حکومت ءَ را دمگی جیڈھ آناں کم کنگ، سفارتی سیادی ءُ امن ءِ دیمروئی ءِ واستہ کوشست آناں مبارک بات دات۔ گند ءُ نند ءِ گڈ ءَ دوئیں نیمگاں پاکستان ءُ ازبکستان ءِ سیادی ءَ را گیش مھکم کنگ ءُ دمگی رابطہ، اقتصادی کمک ءُ دود ءُ ربیدگ ءِ یکجائی ءِ یکجائی وژن ءِ سر ءَ عمل کنگ ءِ وتی جزم ءِ پدر کنگ بوت۔