ایران ءِ صدر ڈاکٹر مسعود پزشکیان اسلام آباد ءَ سر بوتگ ءُ آئی ءَ را صدر، مزن وزیر، نائب مزن وزیر، وزیر ءُ مزنیں کارندہ آں گوں گرمیں وش اتک کتگ

اسلام آباد۔23جون  (اے پی پی):ایران ءِ صدر ڈاکٹر مسعود پزشکیان اسلام آباد ءَ شتگ۔ سئے شمبے ءِ روچ ءَ ایران ءِ صدر ڈاکٹر مسعود پزشکیان ءِ نور خان بالی پٹ ءَ سر بوھگ ءِ سر ءَ صدر آصف علی زرداری ءُ مزن وزیر محمد شہباز شریف ءَ گوں دلجمی ءَ وش آتک کت۔ اے موہ ءِ سر ءَ نائب مزن وزیر ءُ دری کارانی وزیر سینیٹر محمد اسحاق دار، وفاقی وزیر تہی کار محسن نقوی، وفاقی وزیر ءِ اھوالکاری ءُ شنگکاری عطا اللہ تارڑ ءُ مزنیں کارندہ ھم ساڑی اتنت۔ ایران ءِ درئی کارانی وزیر عباس عراقچی ءُ ایران ءِ مزن تک ءِ ڈل ھم صدر مسعود پزشکیان ءِ ھمراہ بوتگ اَنت۔ بالی پٹ ءَ ایران ءِ صدر ڈاکٹر مسعود پزشکیان ءَ را مزنیں وش اتک کنگ بوت، آئی ءَ را 21 توپک ءِ سلامی دیگ بوت وھدیکہ پاک فضائیہ ءِ جے ایف 17 بالی گراب ءَ ھم آئی ءَ را سلامی دات۔ اے موہ ءِ سرءَ روایتی پوشاک پوشیں زھگاں صدر مسعود پزشکیان ءَ را پُل سوت کت وھدیکہ پاکستان ءُ ایران ءِ بیرک گوں دستاں زھگاں ایران ءِ صدر ءَ را وش آتک کت۔ صدر مسعود پزشکیان ءَ زھگانی وش آتکی ءِ نعرہ ءِ پسو ءَ وتی دست ءِ لہڑ دات۔ ایران ءِ صدر مسعود پزشکیان ءَ پاکستانی سروکی ءَ گوں گرمیں گلے ءَ آغوش دات ءُ دست ءُ دیم کت۔ آئی ءِ وش آتک کنگ ءِ واستہ خاتون اول آصفہ  بھٹو زرداری ءُ چیئرمین پاکستان پیپلز پارٹی بلاول بھٹو زرداری ھم ساڑی اتنت۔ اے ایران ءِ صدر ڈاکٹر مسعود پزشکیان ءِ دومی صدر ءِ بستار ءَ پاکستان ءِ تر ءُ تاب اِنت۔