راولپنڈی ۔ 19 دسمبر (اے پی پی) وزیراعظم نا خصوصی کمکار قومی جان جوڑی سروسز ریگولیشنز اینڈ کوآرڈنیشن ڈاکٹر ظفر مرزا پارینے کہ ساڑی حکومت ملک اناغٹ تپہ غاتے جان جوڑی آسراتی تافراوانی کن ہروڑاٹ گام گیج کننگ ءِ، جان جوڑی نابابت ویل آتارداٹ 60ہزار لیڈی ہیلتھ ورکرزبھرتی کننگک، گچین کوشست آتاکمک اٹ تھیلیسیمیا نا توننگ ءِ پک کننگ مریک ۔ داخیال آتا درشانی ءِ او پنچ شنبے نادے آ راولپنڈی میڈیکل یونیورسٹی ٹی 14 می نیشنل تھیلیسیمیا کانفرنس اینڈ ورکشاپ آن تران کرسا کرے ۔ اوپارے کہ تھیلیسمیا فیڈریشن پاکستان، تھیلیسمیا نا مریض آتے کیہی سال آن ہروڑ آسراتی فراوان کننگ کن کاریم کننگ ءِ ۔ کیہی ملک آک سرسہبی اٹ دا ناجوڑی ءِ چٹفینو و نن ہم داوڑ کننگ کینہ ۔ اوپارے کہ تھیلیسیمیا پریونشن کنٹرول پروگرام ءِ گچین کننگ المیءِ ۔ داکان بیدس برام آن مست سکریننگ و کونسلنگ نا کمک اٹ ہم دانا مون ءِ توننگ مریک ۔ اوپارے کہ دا بابت کانود اس ساڑی ءِ، ولے اوفتیا عملدرآمد نا گرج ءِ ۔ اوپارے کہ حکومت 50 لکھ خاہوت آتے ہیلتھ انشورنس کارڈ تسونن وخت اس کہ بروک آ سال انا ایسر اسکان 15ملین خاہوت آتے دا کارڈ جاری کننگک، نن پدریسہ ملک انا غٹ تپہ غاتے جان جوڑی نا بریبر آسراتی فراوان کننگ کن کوشست کننگ اُن ۔ اوپارے کہ پرائمری ہیلتھ کیئر ءِ سوگو کننگ کن 60ہزار لیڈی ہیلتھ ورکرز بھرتی کننگک ہراڑان شیفکو کہول آ جان جوڑی نا ویل آتا ایسر کننگ اٹ کمک رسینگک ۔ منیجنگ ڈائریکٹر پاکستان بیت المال عون عباسی بپی پارے کہ بیت المال ملک انا چندی علاقہ غاتے ٹی تھیلیسیمیا سینٹر اس جوڑ کرینے ۔ اینخو سال تھیلیسیمیا نا مریض آتیا 7 کروڑ روپئی خڑچ کننگانے ۔ پاکستان بیت المال پین وخت اس ہم کمکاری ءِ برجاتخک ۔ صوبائی وزیر جان جوڑی پنجاب ڈاکٹر یاسمین راشد پارے کہ ملک انا 6 درسد آبادی تھیلیسیمیا نا گواچی ءُ، دا مرض انا درمان مننگ کیک دا مرض انا بابت آگاہی ودی کرسا دادے توننگ مریک ۔
