صدر مملکت ڈاکٹر عارف علوی نا نیشنل تھیلیسیمیا کانفرنس اینڈ ورکشاپ آن تران

راولپنڈی ۔ 19 دسمبر (اے پی پی) صدر مملکت ڈاکٹر عارف علوی پارینے کہ پاریزی اٹ تھیلیسیمیا نا مرض ءِ تالان مننگ آن توننگ مریک، تھیلیسیمیانا توننگ کن ہروڑگام گیج کروئی مریک، وزیراعظم ہم جان جوڑی نا بشخ ءِ اولیت جوڑ کرینے، جان جوڑی نا بجٹ ءِ ودفنگانے ، پاکستان ءِ سرسوز و ساف جوڑ کننگ کن ہر بندغ ءِ تینا کڑد ءِ ادا کروئی مریک ۔ داخیال آتا درشانی ءِ او پنچ شنبے نادے آ 14می نیشنل تھیلیسیمیا کانفرنس اینڈ ورکشاپ آن تران کرسا کرے ۔ صدر مملکت پارے کہ تھیلیسیمیا نا توننگ کن ہروڑگام گیج کروئی مریک ۔ تھیلیسیمیا نا مرض انا توننگ نا بابت ایران نا مثل ننا مون آٹی ءِ ۔ وزیراعظم ہم جان جوڑی نا بشخ ءِ اولیت تسنے ۔ جان جوڑی نا بشخ انا بجٹ ءِ ودفنگا کم کننگتنے ۔ اوپارے کہ پاکستان اٹی تھیلیسیمیا نا اسہ لکھ مریض ءُ ۔ تھیلیسیمیا نا مریض آتا آشرحالی کن کاریم کننگ نیکی اسے ۔ صدر مملکت پارے کہ پاریزی اٹ تھیلیسیمیا نا مرض ءِ توننگ مریک ۔ راج اٹی تھیلیسیمیا نا مریض آتا شرحالی کن گام گیج کروئی مریک ۔ صدر مملکت پارے کہ راج اٹی آگہی مہم آن تھیلیسیمیا نا مرض انا مون ءِ توننگ مریک ۔ کانود آن جوڑ کننگ آن زیات دانا نافذ کننگ اہم ءِ ۔ ہیپاٹاءٹس نا مرض انا توننگ کن ہم گام گیج کننگے ۔ پاکستان ءِ سرسوز و ساف جوڑ کننگ ننا غٹ انا فرض ءِ ۔ داڑکن ننے تینا کڑد ءِ ادا کننگ نا گرج ءِ ۔ صدر مملکت پارے کہ پاکستانی تیٹی خیرات و عطیہ تننگ نا بھلو جوزہ اسے ، خیرات تروک آ خواجہ غاک تھیلیسیمیا نا مرض انا توننگ کن خیرات و عطیہ غاتا کمک اٹ دا خیر انا کاریم اٹ پبی بشخ شاغر ۔ اوپارے کہ قوم اٹی دا مرض انا تشخیص پاریزی و درمان نا بابت آگاہی ودی کننگ نا گرج ءِ، راج اٹی میڈیا و مسیت آتا اہم ءُ کڑ داسے ۔ تھیلیسیمیا ، پولیو تون اوار ایلو موذی مرض آتون اوار راجی برائی تا بابت آگاہی ٹی میڈیا اہم ءُ کڑد اس ادا کننگ کیک ۔ اوپارے کہ ڈرامہ سیریل اٹی خاص کلہو آتا کمک اٹ ہم آگاہی ودی کننگ مریک ۔ اوپارے کہ ہیپاٹاءٹس و تھیسلیمیا کون آ ناجوڑی تا دترنا اسہ ٹیسٹ انا کمک اٹ ڈس اکن لاءحہ عمل اس تیار کننگ نا گرج ءِ وخت اس کہ ملک انا جان جوڑی نا ویل آتا ایسری نا بابت جامع حکمت عملی المی ءِ ۔ اوپارے کہ تھیلیسیمیا غان زوال کروک آ عثمان ءِ بروک آ 23مارچ آ صدارتی ایوارڈ تننگک ۔ انتئے او نئے تینٹ دا ناجوڑی نا بہادری اٹ مقابلہ ءِ کرے بلکن تھیلیسیمیا نا ایلو مریض آتا ہم کمک ءِ کرے ۔ دود آن وزیراعظم نا خصوصی کمکار قومی ہیلتھ سروسز ریگولیشنز اینڈ کوآرڈنیشن ڈاکٹر ظفر مرزا ، صوبائی وزیر جان جوڑی پنجاب یاسمین راشد، پاکسان بیت المال نا منیجنگ ڈائریکٹر عون عباسی بپی و صدر تھیلیسیمیا فاءونڈیشن پاکستان لیفٹیننٹ جنرل (ر) معین الدین حیدر ئسک ہم تران کریر ۔