اسلام آباد۔ 18 دسمبر (اے پی پی) اسپیکر قومی اسمبلی اسد قیصر پارینے کہ پاک چین اقتصادی راہداری ڈٹ ننا بروک آ چین تا آخبت ءِ، حکومت دا ڈٹ انا پوروی و دانا بھرم تیان نئے بیرہ پاکستان بلکن نیامی ایشیاء نا ملک آتسکان سرکننگ کن ہر حداسکان کاہک۔ چارشنبے نادے آ پاکستان انسٹیٹیوٹ آف پارلیمنٹری سروس اٹی علاقائی یکجہتی نا سرحال آن اڈ ہلوک آ اسہ دے ئی مذاکرہ غان تران کرسا اسپیکر قومی اسمبلی اسد قیصر پارے کہ نن خوانہ کہ سی پیک ڈٹ ءِ گچین کننگے و ہراوڑ دا ڈٹ ءِ اوغانستان نا کمک اٹ نیامی ایشیانا ملک آتون گنڈنگے۔ اوپارے کہ دا چین نا پاکستان کن اسہ بھاز بھلو ٹیکی اسے و دا ڈٹ آن ننا زرگزران ءِ بے کچ نمو ملنگ کیک۔ دا ڈٹ انا پوروی آن نن تینا اقتصادی چیلنج آتیان ہم پیشن بننگ کینہ۔ اوپارے کہ کنا کرغزستان و نیامی ایشیاء نا ملک آتا ایلو سفیر آتون ہم ہیت وگپ مننگ ءِ۔ اسپیکر پارے کہ اینو نا مذاکرہ ٹی سرجم شرہ و ہیت و گپ نا کمک اٹ نن بایدے نتیجہ سے آ سرمرینو ننے دا ہیت ءِ مون آ تخنگے کہ سی پیک نا کمک اٹ نیامی ایشیا ملک آتے ٹی ساڑی اقتصادی شونداری نا بے کچ لائخی آن ہراوڑ فائدہ ہرفنگ کینہ۔ اوپارے کہ دہشت گردی ننا زرگزران ءِ بھس کرینے۔ دا ڈٹ انا کمک اٹ نن امن و بروک آ چین تیکن گچین ءُ پاکستان اس تننگ کینہ انتئے کہ دا ڈٹ ننا بروک آ چین تا آخبت ءِ۔ قومی اسمبلی دا بابت ہر حد اسکان کاہک۔ اسپیکر قومی اسمبلی پارے کہ وزیراعظم عمران خان نا حکومت نا ویژن ءِ کہ ملک انا برآمد آتے زیات آن زیات ودفنگے و دا چرجوئی ٹی کنا ویژن ”لک افریقہ“ نا رداٹ نن پارلیمانی کمیٹی اس جوڑ کننگ اُن ہرا افریقہ ٹی پاکستان مصنوعات آتا برآمد آتا وارخواہی پٹسا تینا سلاہ و سوج آتے پیش کیک۔ اسپیکر پارے کہ دنیا نا کیہی ڈیہہ داسہ ہم ہندن ءُ ہراڑے ننا مشن اسکان ہم ساڑی اف۔۔ نن دا بابت ہم تینا پبی کڑد ءِ ادا کینہ انتئے کہ ملک انا برآمد آتے ٹی ودکی وخت انا اہم ءُ خواست اسے۔ مستین اٹی دا بشخ ءِ گوجالنگا۔ ساڑی حکومت پاکستان مصنوعات آتا برآمد آتے مچ آ دنیا اسکان سرکننگ کن تینا پبی کڑد ءِ ادا کننگ ءِ۔
