کوئٹہ۔ 16 فروری (اے پی پی) صوبائی وزیر داخلہ و قبائلی امور میر سرفراز بگٹی پارینے کہ بمب ڈسپوزل اسکواڈ نا کارندہ عبدالرزاق تینا جان ئِ ندر کرسا کوئٹہ نا شاری تے بھلو تباہی اسے آن بچفینے۔ حکومت شہید آتا خاہوت آتون ہروڑکمک کیک۔ شہید عبدالرزاق نا خذمت آتے ہمیشہ یات تخنگک۔ داخیال آتا درشانی ئِ او پنچ شنبے آ بمب ئِ ناکارہ جوڑ کرسا جام شہادت نوش کروک آ بمب ڈسپوزل اسکواڈ نا کانسٹیبل عبدالرزاق نا اُراغا ہنسا فاتحہ خوانی کرسا کرے۔ میر سرفراز بگٹی شہید انا ارا والاتتون دلی ہمدردی و ہڑزخواہی کرسا عبدالرزاق نا خذمت آتے خراج تحسین پیش کرسا پارے کہ شہید آک ننا پیشانی نا جھومر ئُ و شہید وخت اس ہم کسپک بلکن ہمیشہ زندہ سلک ۔ وزیرداخلہ و قبائلی امور میر سرفرازبگٹی پارے کہ عبدالرزاق اسہ نڈر و بہادر ئُ ورناس ئس ہرا کوئٹہ تون اوار ایلو علاقہ غاتیٹی سدآ بمب آتے ناکارہ جوڑ کرسا کودک انسان تے بچفنگ کن تینا جان ئِ ندر کننگ نا پرواہ کتو۔ اودعا کرے کہ اللہ تعالیٰ شہید عبدالرزاق ئِ جنت الفردوس اٹی بڑزکو ہند اس نصیب کے و خاہوت ئِ صبر و جمیل عطاءفرمائفے۔
