جنیوا۔ 17 دسمبر (اے پی پی) مزن وزیر عمران خان ءَ یونائیٹڈ نیشن ءُُ میاں اوستمانی برات آں گوں مقبوضہ کشمیر ءِ جاور ھال ءُُ بھارت ءَ شہریت ءِ کشاں چیل بوھوکیں بل ءِ منظوری ءِ سر ءَ نوٹس زورگ ءِ اپیل دیان ءَ گوشت کہ دگنیا بزانت کہ بھارت ءَ پناہ گیر آنی یک ٹوھیں جیڈھ ءِ بندات بوھگ ءَ انت، 5 اگست ءَ چہ مقبوضہ کشمیر ءِ 80لکھ الس بندی اَنت، پا زانت ءُُ کزدن مسلمان آنان درئی نیک راھ آنی تہ ءَ مٹ کنگ ءِ کوشست کنگ بوھگ ءَ انت، مارا ترس انت کہ کشمیر ءِ جیڈھ ءِ سر ءَ دلگوشی نہ دیگ بوت گڈا دو ایٹمی ملک آنی نیام ءَ وت مہ وت ڈوک ورگ بیت، بھارت ءَ را گیر کانودی کار ءَ چہ مکن کنان ءَ پناہ گیر آنی یک ٹوھیں جیڈھ ءِ گر ءُُ دار کنگ بیت کنت، بھارت ءَ مسلمان آنی شہریت ءَ را ھلاس کنگ ءِ واستہ نوک وت سرئیں بل ءِ منظور کتگ، 20کروڑ بھارتی مسلمان آنی وت واجئی ھک ءَ را پُلگ بوھگ ءَ انت۔ اے کانود ءِ وسیلگ ءَ بھارت ءَ کشاں چیل بوھگ ءَ انت ءُُ مردم دگ آنی سر ءَ در اتکگ اَنت، پاکستان مشکل آں گوں دیم پہ دیمی ءَ ابید 30لکھ اوگان پناہ گیر آنی میزبانی ءَ کنگ ءَ انت، لوٹاں کہ چیل سال ءَ چہ جیڈھ آنی آماچیں اوگان اسل آناں ایمنی ءِ برورد بہ رس اَنت، اے رنگیں جاور پیداک کنگ لوٹ انت کہ پناہ گیر ازت ءُُ شرپ ءِ گوما وتی وطن ءَ واتر شُت بکن اَنت، بے وس ءُُ بے کسیں لڈ ءُُ بار کنوک آنی جیڈھ ءَ را امیریں ملک ھم سگ اِت نہ کناں۔ اے ھیالانی درشانی اائی ءَ سئے شمبے ءِ روچ ءَ پناہ گیر آنی ھوالگ ءَ میاں اوستمانی فورم ءَ گوں گشتانک دیان ءَ کت۔ مزن وزیر ءَ گوشت کہ پناہ گیر آنی ھوالگ ءَ میاں اوستمانی فورم ءِ برجائی ءَ چہ وشی بوتگ، پاکستان ءَ پیسریگیں سال ءَ اوگان پناہ گیر آنی میزبانی ءَ کنگ ءَ انت ایشانی ھواریں کساس 30 لکھ ءَ چہ گیش انت۔ آئی ءَ گوشت کہ پاکستان ءِ وڑیں گریبیں ملک آھودا بے روزگاری انت ءُُ الس ءِ بنیاتی ضلورت آناں سرجم کنگ ءِ واستہ گامگیج کنگ بوھگ ءَ انت آھودا اینکیاس مزنیں کساسے پناہ گیر است انت۔ پاکستان ھما ملک انت کہ آ بنداتی روچاں بنی آدمی راجدپتر ءِ درستاں چہ مستریں پناہ گیر جنز ءِ بھر جوڑ بوتگ انت۔ آئی ءَ گوشت کہ میاں اوستمانی برات یونائیٹڈ نیشن ءِ سیکرٹری جنرل ءُُ میاں اوستمانی برات اے جاور ھال آنی رد ءَ نوٹس بہ زور انت، ایشانی گر ءُُ دار آسان نہ بیت ءُُ ایشی ءَ چہ پیداک بوھوکیں نتیجگ آناں ھم دماگ ءَ کنگ لوٹ ایت۔ آئی ءَ گوشت کہ پناہ گیر آنی ھوالگ ءَ پیسر ءَ چہ میاں اوستمانی فورم ءِ بنگیج ءِ پد ءَ وشی رستگ، درستاں چہ گیش پناہ گیر آنی میزبانی ءِ پد ءَ ترک صدر ءُُ ترک الس ءَ را توسیپ ءُُ ستا پیش کناں۔
