اسلام آباد۔ 17 دسمبر (اے پی پی) اسپیکر قومی اسمبلی اسد قیصر وزیرخارجہ شاہ محمود قریشی تون اوڑدہی کرینے ہراٹی ہڑتوم آ راہشونک الیکشن کمیشن نا باسک و چیف الیکشن کمشنر نا باندات ءِ افہام و تفہیم اٹ ایسر کننگ آ امناکریر۔ اوڑدہی ٹی چیف الیکشن کمشنر و الیکشن کمیشن نا باسک آتا تعیناتی آ مروک آ پیش رفت آ گپ و تران کننگا، بھارت نا جھیڑہ ئی شہریت بل آن ڈیہہ ٹی ودی مروک آ حالیت آتیا ہم گپ و تران مس۔ وزیر خارجہ اسپیکر ءِ اپوزیشن تون مروک آ اوڑدہی تیان معلومدار کرے و باندات ءِ ایسر کننگ کن غٹ سیاسی جماعت آتون سلابت ءِ برجاتخنگ نا فیصلہ ہم کننگانے۔ داوخت آ اسپیکر قومی اسمبلی اسد قیصر پارے کہ پارلیمان نا بالادستی ءِ برجاتخنگ کن الیکشن کمیشن نا باندات ءِ پارلیمانی کہول آ ایسر کننگ المی ءِ، اپوزیشن و حکومت اٹی دا باندات آ امنائی ودی کننگ کن تینا کڑدءِ برجاتخیوہ۔ اوپارے کہ دا باندات ءِ ایسر کننگ کن غٹ سیاسی جماعت آتے است بھلنی نا درشانی ءِ کروئی مریک۔ داوخت آ وزیر خارجہ پارے کہ بھارتی ساڑی آ گام گیج ءِ پاش کننگ کن پارلیمانی سفارتکاری اہم کڑد اس ادا کننگ کیک۔ اوپارے کہ حکومت الیکشن کمیشن نا باندات ءِ پارلیمانی کہول آ افہام و تفہیم اٹ ایسر کننگ خواہک۔
