اسلام آباد۔ 17 دسمبر (اے پی پی) وزیر خارجہ مخدوم شاہ محمود قریشی پارینے کہ بھارتی حکومت آر ایس ایس نا ایجنڈا غا ہِننگ ءِ، بھارت نا اسہ سیکولر و ڈیموکریٹک ریاست نا امیج دفن مسنے، ہندوراشٹرا و ہندوتوا نا سوچ ءِ نافذ کننگ انگ ءِ، داسہ ہرا سٹیزن ترمیمی ایکٹ ءِ منظور کننگانے داٹی اقلیت خاص کر مسلمان تا برخلاف امتیازی سلوک کننگانے و دانا برخلاف مچ آ بھارتی اپوزیشن برانز کننگ ءِ وخت اس کہ مچ آ ملک اٹی مچی ہم مننگ ءِ، مذہبی آجوئی آ کاریم کروک آ تنظیمک ہم دا امتیازی کانود نا برخلاف اعتراض کریر۔ داخیال آتا درشانی ءِ او سے شنبے نادے آ میڈیا تون گپ و تران اٹی کرے۔ اوپارے کہ پاکستان منہ وخت آن دنیا ءِ باور کرفیکہ کہ بھارتی سرکار آر ایس ایس نا ایجنڈا غا روان ءِ، بھارت نا اسہ سیکولر و جمہوری ریاست نا امیج اینو دفن مسنے، ہندوراشٹراو ہندوتوا نا سوچ ءِ نافذ کننگ انگ ءِ، اوپارے کہ 5 اگست آ ہراتم بھارت غیر کانودی وڑاٹ مقبوضہ کشمیر ءِ تین تون ملحق کرے تو پاکستان مچ آ دنیا ٹی دا غیر کانودی گام انا برخلاف توار بڑز کرے، بھاز انگا خلقت داڑاچکار کریر و بھاز انگا خلقت مصلحت نا رداٹ خاموشی اختیار کریر او بنائس، داکان پد بابری مسیت نا فیصلہ بس ہرا بھارت نا مسلمان تے حیران کرے و بھارتی عدلیہ نا کنڈ ہلنگ آ ہم خلقت ششدرسلیسر، اوکان پد این آر سی نا گام مون آ بس ہرا بیست لکھ خلقت ءِ سٹیٹ لیس کرے و داسہ ہراسٹیزن ترمیمی ایکٹ ءِ منظور کننگانے اوٹی اقلیت خاص کر مسلمان تا برخلاف امتیازی سلوک کننگانے و دانا برخلاف مچ آ اپوزیشن برانز کننگ ءِ وخت اس کہ مچ آ بھارت اٹی مچی ہم مننگ ءِ۔ شاہ محمود قریشی پارے کہ بھارتی حکومت پرامن برانز کروک آتے بدترین بیدادی نا شست کننگ ءِ، ہراوڑ علی گڑھ مسلم یونیورٹی نا طالب علم آتیا بیداد کننگا و ہراوڑ جامعہ ملیہ نا مسن تے بیدادی نا شست کننگا اودنیا نا مون آٹی ءُ۔ اونا پاننگ ئس کہ پارلیمنٹ نا باسک آتے بے کچ منت وار اُٹ کہ درو ہراتم ای دا ایشو ءِ پارلیمنٹ اٹی ہرفیٹ تو غٹ باسک آک کنتون تفیر و امنائی وڑاٹ نن دا امتیازی کانود نا برخلاف قرارداد اس منظور کرفنگ اٹ سرسہب مسن۔ وزیر خارجہ پارے کہ پاکستان دا امتیازی کانود نا برخلاف ہر فورم آ توار بڑز کیک، نن سمجھنہ کہ دا پوسکن آ کانودامتیازی ءِ ہنداخاطران بھارت دمدستی اودے پدی ہلے، مذہبی آجوئی آ کاریم کروک آ تنظیمک ہم دا امتیازی کانود نا برخلاف اعتراض کرینو۔ اوپارے کہ پرامن برانز جمہوری و بنداوی حق ءِ۔
