اسلام آباد۔ 17 دسمبر (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ حکومت پاکستان سی پیک ڈٹ آتا زوت پوروی کن پورو پرعزم ءِ، سی پیک آن ڈیہہ نا قسمت ءِ بدلیفنگ و ڈیہہ ٹی شونہالی نا پوسکن ءُ کسر اس ملنگک، وزیراعظم ساڑی ہی ٹی گوادر نا دورہ ٹی ارب آ روپئی نا ڈٹ آتا پڑو ءِ کرے، سی پیک نا برخلاف مخالف آتا چم بازی تے بے سہب کننگ آ پاکستانی میڈیا نا کڑد سفت نا قابل ءِ۔ او سے شنبے نادے آ ہندی ہوٹل اٹی ”بیلٹ اینڈ روڈ نا شریدار آتے ٹی کراس ریجنل میڈیا فیوژن“ نا سرحال آن جہانی کانفرنس آن تران کریکہ۔ وزیراعظم نا خصوصی کمکار ڈاکٹر فردوس عاشق اعوان پارے کہ وزیراعظم عمران خان اینخو سال انا بناآ سی پیک نا دیکی روٹ آ گوادر نا دورہ ءِ کرسا 65 کروڑ نا خڑچ آن ژوب کچلاک روڈ ڈٹ، 70 ارب روپئی نا خڑچ آن مکران کوسٹل ٹرانسمیشن لین نا بنداو و 23 ارب روپئی نا خڑچ آن پوسکن آ گوادر بالی پٹ انا ہم بناءِ کرے۔ اوپارے کہ چین اسہ ارب ڈالر نا زرکاری آن اِراسال اٹی معاشی و راجی بشخ اٹی کاریم کیک، 20 ہزار پاکستانی طالب علم آتے اسکالر شپ تننگ تون اوار اوار ملک انا چندی بشخ آتے ٹی اسہ ہزار اسکول جوڑ کننگک، چین سی پیک نا رداٹ پاکستان نا فائدہ نا غٹ ڈٹ آتیا عملدرآمد ءِ پک کیک۔ وزیراعظم نا خصوصی کمکار ڈاکٹر فردوس عاشق اعوان پارے کہ گوادر اٹی ساڑی ٹی کولاآن چلینگوک آ بجلی گھر نا بنامسنے۔ اوپارے کہ سی پیک نا غٹ ڈٹ آتیا عملدرآمد ترندی اٹ برجاءِ، داڑان نئے بیرہ ڈیہہ ٹی شونداری نا پوسکن آ دور بناکیک بلکن پاکستان نا الس نا اقتصادی، تمدنی، سیل و سواتی و معاشی شونداری نا ضامن ہم مریک۔
