ہری پور۔ 17 دسمبر (اے پی پی) بنجائی وزیر توانائی، پٹرولیم و قدرتی وسیلہ عمر ایوب خان پارینے کہ الس نا زند انا آب ءِ بڑز کننگ کن گچین کاری وعدہ غاتیان ود ضلع کن شونداری پیکج اتنگ اُن، مچ آ ضلع نا الس نا بے پرخ خذمت نا چرجوئی برجاءِ، پنچ سال اٹی حلقہ نا پسماندگی و محرومی تے چٹفسا ساہ الینہ۔ او تدوک آ دے خلق درہ ٹی اسہ کروڑ 9 لکھ روپئی نا فنڈ آن گیس انا فراوانی ڈٹ و سلطان پور اٹی 40 لکھ روپئی نا خڑچ آن روڈ آتے پکا کننگ و ایلو شونداری اسکیم تا بناءِ کننگ نا وخت آ السی جلسہ غاتیان تران کریکہ۔ داوخت آ پی ٹی آئی نا سینئر راہشون مسکوہی صوبائی وزیر یوسف ایوب خان و چیئرمین ڈیڈیک ارشد ایوب خان تون اوار ایلوفک ہم تران کریر۔ عمر ایوب خان پارے کہ گچین کاری جلسہ غاتے ٹی علاقہ والاتون ہراوعدہ غاتے کریسن اوفتے اسٹ اسٹ کرسا پورو کننگ اُن، ہری پور نا الس اونا خاہوت آ ہرا پت انا درشانی ءِ کرینو اواودے کہینگ اسکان اوفتے گیرام کننگ کپک، الس نا خلوص و مہر و مریبت او و اونا خاہوت ءِ ہمیشہ کن ہلکونو، او بحیثیت بنجائی وزیر و صوبائی وزیر اکبر ایوب خان و ارشد ایوب خان صوبہ ٹی الس نا گچین نمائندگی ءِ کننگ ءُ، ہندا سوب ءِ کہ داوخت آ ہری پور اٹی بیرہ یک و نیم سال اٹی بجلی، گیس، جان جوڑی، تعلیم و روڈ آتا جوڑ کننگ تون اوار زند انا ایلو بشخ آتے ٹی ارب آ روپئی نا شونداری ڈٹ آتیا عملی کاریم برجاءِ ہرافتا پوروی آن ضلع نا نقشہ بدل مریک۔
