اسلام آباد۔ 17 دسمبر (اے پی پی) پاکستان علماء کونسل نا چیئرمین و صدر وفاق المساجد و المدارس حافظ محمد طاہر محمود اشرفی پارینے کہ بیرہ تین پہ تینی سیوت اٹ انتہاپسندی، دہشت گردی و اسلامو فوبیا ءِ شکست تننگ مریک، بھارت اٹی اقلیت آتیا مروک آ ظلم آتیا دنیا نا چپی ءِ پرغوئی مریک، پاکستان علماء کونسل ہر کہول آ بین المذاہب و بین المسالک مکالمہ و ہم گرنچی کن کوشست کننگ ءِ۔ داخیال آتا درشانی ءِ او سے شنبے نادے آجاری اسہ بیان اسے ٹی کرے۔ طاہر اشرفی پارے کہ انتہاپسندی، دہشت گردی، فرقہ وارانہ بیدادی و اسلاموفوبیا نا برخلاف دنیا ٹی اسہ سجفوک جہد اسے نا گرج ءِ، منہ ہفتہ ٹی مروک آ واقعہ غاک دا ہیت انا خواست ءِ کیرہ کہ غٹ مذہب و مسالک آتا سرکڑدہ غاک امن نا کسر ءِ سوگوی تننگ کن یکجا مریر و دُن انگا عنصر آتے بے نقاب کننگے ہرا مذہب نا پن ءِ ہلسا دنیا ٹی بیدادی و بدامنی تالان کننگ نا سازش کننگ ءُ۔
