منامہ۔ 16 دسمبر (اے پی پی) مزن وزیر عمران خان بحرین ءِ اولی سرکاری تروتاب ءِ سرا منامہ ءَ سر بوتگ ات۔بحرین ءِ ولی عہد سلمان بن حمد بن عیسی الخلیفہءَ مزن وزیر ءَ را وش اتک کتگ۔ بحرین ءِ شاہ حمد بن عیسی بن سلمان آل خلیفہ ءَ مزن وزیر ءَ را بحرین ءِ تروتاب کنگ ءُُ بحرین ءِ راجی روچ ءِ تہ ھاسیں مہمان ءِ بستار ءَ بھرزورگ ءِ دعوت داتگ ات۔ اے موہ ءِ سرا یک مزن تکی ڈل ءَ ھم مزن وزیر ءِ ہمبراہ انت ایشی ءِ تہ کابینہ ءِ باسکانی ابید دگہ مزن تکے واکدارھم ساڑی اتنت۔تروتاب ءِ موہ ءَ مزن وزیر ءَ را بحرین ءِ مستریں سول اعزاد ھم دیگ بیت۔مزن وزیر کارگس ءِ میڈیا ونگ ءِ نیمگا چہ جاڑی بیان ءِ ردا مزن وزیر عمران خان ءِ اگست 2019ءِ تہ مزن وزیری ءِ سوگند چست کنگ ءِ پدا بحرین ءِ اولی تروتاب انت۔تروتاب ءِ تہ عزت مآب حمد بن عیسی آل خلیفہ ءِ گوما آئی ءِ دست دراہی ھم بیت وھدیکہ ولی عہد سلمان بن حمدآل خلیفہ ءِ گوما ڈلانی تبک ءِ سرا ھم گپ ءُُ تران بیت۔گپ ءُُ تران ءِ تہ دوئیں ملکانی میان ءَ دودیمی سیادی ءِ دراھیں معاملہ ءِ ابید میاں اوستمانی ءُُ دمگی معاملہانی سرا ھم چار ءُُ تپاس بیت۔مزن وزیر ءَ را تروتاب ءِ ساعت ءَ آہاں را مستریں سول داد ءَ گوں ھم نوازگ بیت۔ پاکستان ءُُ بحرین ءِ میان ءَ یکجاھیں عقیدہ ءُُ ربیدگ،وت مہ وتی اعتماد ءُُ ہم آہنگی ءِ سرا ھوار نزیکیں سیادی انت،دوئیں ملکانی میان ءَ سیاست،بیئپار،دفاع،اُلسی رھوتءِ ھوار،لہتیں تکانی تہ دودیمی دراج وھدی سیادی انت۔پاکستان ءُُ بحرینءِ میان ءَ اقوام متحدہ، اوآئی سی ءُُ جی سی سی ءِ ھوار دراھیں فورمز ءِ سرا نزیکیں کمک انت۔دوئیں ملکانی میان ءَ ادارہ جاتی تبک ءِ سرا رھوت انت ایشی ءِ تہ دودیمی سیاسی شؤرءُُ صلاح ءُُ یکجاھیں وزارتی کمیشن ھم انت، ایشی ءِ مکسد لہتیں تکانی تہ دودیمی کمک ءَ را پراھی دیگ انت۔دوئیں ملکانی میان ءَ پارلیمان ءِ تبک ءِ سرا ھم نزیکیں کمک ہڈ انت۔یک لکھ چہ گیش پاکستانی بحرین ءِ چاگردی ءُُ اقتصادی دیمروئی ءِ تہ وتی چکاریں کرد ءَ ادا کنگ انت۔ بحرین ءِ تہ نشتگیں پاکستانی دوئیں ملکانی میان ءَ سوگو ءِ پُل ءِ کار ءَ کنگ انت۔مزن وزیر ءِ بحرین ءِ تروتاب ءَ چہ دوئیں ملکانی میان ءَ بیئپارءُُ زرکاری ءَ را گیش کنگ ءَ کمک رسیت ءُُ اے مکسد ءِ زورگ ءِ ھاترا لہتیں راھبندانی سرا چارءُُ بچار کنگ بوھگ انت۔اے تروتاب اے ھاترا ارزشت دار انت کہ دوئیں ملکانی میان ءَ سیادی ءَ را نزیک کنگ ءُُ کمک ترند کنگ ءَ کمک رسیت۔
