نیزگاری ءِ کم کننگ کن تعلیم و جان جوڑی نا آسراتی تا فراوانی اہم ءِ، خوانوک آ ورناک ملک و قوم و دنیا نا گچین وڑاٹ خذمت ءِ کننگ کیرہ
اسلام آباد۔ 16 دسمبر (اے پی پی) صدر مملکت ڈاکٹر عارف علوی تعلیم نا اہمیت ءِ تالان کرسا پارینے کہ نیزگاری ءِ کم کننگ کن تعلیم و جان جوڑی نا آسراتی تافراوانی اہم ءِ، دنیا ءِ مون تروک ماحولیات کون آ ویل آتون مون تننگ کن خوانندہ انسانیت نا گرج ءِ، خوانوک آ ورناک ملک و قوم و دنیا نا گچین وڑاٹ خذمت ءِ کننگ کیرہ، پوسکن آ ٹیکنالوجی ءِ کاریم اٹ اتسا ملک اٹی تعلیم نا شیفکو کہول اسکان فراوانیءِ پک کننگک، مقبوضہ کشمیر اٹی تدوک آ پنچ تُو آن اسکول آک بند ءُ، اسٹ اسے ہم اسکول آتا ملنگ نا معلوم اف، بھارت اٹی مذہب نا پن آ خار تالان کننگ انگ ءِ۔ دوشنبے نادے آ ”علم پاسیبل سمٹ2019“ آن تران کرسا صدر مملکت پارے کہ برٹش کونسل نا دا پروگرام ستاکڑزک، دا کنا و ساڑی آ حکومت نا ہردل عزیز مشن ءِ۔ اوپارے کہ نیزگار آ چناتے اسکول آ اتنگ کن اسہ راجی تنظیم اسے تون اواری اٹ کاریم کرین۔ وزیراعظم عمران خان جان جوڑی و تعلیم ءِ راجی خذمت کن گچین کرینے۔ اوپارے کہ برٹش کونسل نا کنڈآن 3لکھ 85ہزار آؤٹ آف اسکول چناتے اسکول آتے ٹی اتنگ بھاز بھلو خذمت اسے۔ اوپارے کہ تعلیم بیرہ پاکستان نا آخا بلکن مچ آ دنیا نا ویل ءِ، دنیا ءِ مون تروک ویل ماحولیات کون آ ویل آتون مون تننگ کن خوانندہ انسانیت نا گرج ءِ، خوانندہ ورناک ملک و قوم و دنیا نا گچین وڑاٹ خذمت ءِ کننگ کیرہ۔ صدر مملکت پارے کہ برطانوی حکومت پاکستان اٹی تعلیم نا بشخ اٹی اہم کڑد ادا کننگ ءِ۔ برطانوی شہزادہ ولیم نا دورہ پاکستان نا وخت آ دابابت اوڑتون ہیت ہم مس۔ اوپارے کہ مسن تے اسکول آ مون تننگ نا بابت ننے راجی اعتبار اٹ خلقت نا سوچ ءِ بدل کننگ نا گرج ءِ، تینا حلقہ ٹی مسن تا تعلیم کن اسکول آتا اپ گریڈیشن کرفین۔ اوپارے کہ تدوک آ منہ سال اٹی بیرہ اسکول آتا انفراسٹرکچر آ چکار کننگا ولے داسہ انفراسٹرکچر تون اوار اوار تعلیم نا آب آ ہم چکار کننگ انگ ءِ، لمہ و باوہ غاتے ٹی چناتا رکھ مننگ و اوفتے غٹ آسراتی تا فراوانی نا بارواٹ است جم کننگ نا گرج ءِ۔ دود آن کنٹری ڈائریکٹر برٹش کونسل عامر رمضان، ریجنل ڈائریکٹر سوسائٹی سویلی ایشیا ء برٹش شازیہ خاور ئسک ہم تران کریر۔ دود اٹی سانحہ اے پی ایس نا پنچ سال مننگ آ شہید آتے بشخ ہلوک آک 30 سکینڈ خاموشی اٹ سلسا خراج عقیدت پیش کریر۔
