کودک جان تا قربانی ہروڑنا انتہاپسندی، دہشت گردی، بیدادی و خار انا برخلاف قوم ءِ یکجا کرینے، عسکریت پسندی نا سوچ ءِ شون ہلنگ کن الیپنہ
اسلام آباد۔ 16 دسمبر (اے پی پی) وزیراعظم عمران خان سانحہ اے پی ایس نا شہید آتے خراج عقیدت پیش کرسا پارینے کہ کودک جان تا قربانی ہروڑنا انتہاپسندی، دہشت گردی، بیدادی وخار انا برخلاف قوم ءِ یکجا کرینے، اینو نن عہد کینہ کہ عسکریت پسندی نا سوچ ءِ ملک اٹی شون ہلنگ کن الیپنہ۔ دوشنبے نادے آ سانحہ اے پی ایس نا پنچ سال پورو مننگ آ تینا کلہو اٹی وزیراعظم پارے کہ سانحہ اے پی ایس پشاور نا شہید و دا سانحہ ٹی بچوک آتے کن دعا کننگ اٹی اُن۔ کودک چناتا دتر قوم ءِ ہر وڑنا انتہاپسندی، دہشت گردی، بیدادی و خار انا برخلاف یکجا کرینے۔ اوپارے کہ ہراڑے اینو نن تینا دا شہید آتے خراج عقیدت پیش کننگ اُن ہموڑے تینا سلہہ بند فوج، پولیس وکانود نافذ کروک آ ادارہ غاتے ہم دہشت گردی نا برخلاف جنگ اٹی قربانی تیا خراج تحسین پیش کینہ۔ وزیراعظم پارے کہ نن دا عہد کینہ کہ عسکریت پسندی نا سوچ ءِ ملک اٹی پین مون آ دننگ کن الیپنہ و قوم ءِ دامکروہ سوچ انا یرغمال مننگ کن الیپنہ۔
