اسلام آباد۔ 16 دسمبر (اے پی پی) وزیراعظم عمران خان پگہ سے شنبے نادے آ بناکروک آ باہوٹ آتا بابت اولیکو جہانی فورم (جی آر ایف) اٹی بشخ ہلیک۔ دوشنبے نادے آ وزیراعظم میڈیا آفس آن جاری بیان نا رداٹ باہوٹ آتا بابت اقوام متحدہ نا ہائی کمشنر (یو این ایچ سی آر) و سوئٹزر لینڈ نا حکومت جی آر ایف نا اسیجا میزبانی ءِ کننگ ءُ۔ وزیراعظم عمران خان ءِ ترکی نا صدر رجب طیب اردوان و کوسٹاریکا، ایتھوپیا و جرمنی نا راہشون آتون باہوٹ آتا راجی آسراتی و رکھ اکن تینا بے مٹ کڑد انا سوب فورم نا اسیجا کماشی ءِ کننگ نا سلہ خلکونے۔ باہوٹ آتا بارواٹی جہانی فورم 21 می صدی نا باہوٹ آتا بارواٹی اولیکو بھلا دیوان ءِ ہرا اقوام متحدہ نا باہوٹ آتا بابت ادارہ یو این ایچ سی آر و سوئٹزر لینڈ نا حکومت نا کنڈآن 17 و 18 دسمبر آ اڈ ہلنگ ءِ۔ اقوام متحدہ نا سیکرٹری جنرل انتونیوگوٹریس ہم فورم آن تران کیک۔ گمان ءِ کہ فورم نا اڈتننگ آن مچ آ دنیا ٹی باہوٹ آتا ودوک آ کچ انا ویل اتون مون تننگ کن چندی ملک آک، جہانی تنظیمک، نجی بشخ و سول سوسائٹی نا کنڈآن کروک آ وعدہ غاتے وسیع البنیاد کننگ و سیاسی مخ تفی و یکجہتی ءِ مون آ دننگ اٹ کمک رسینگک۔ وزیراعظم اوغان باہوٹ آتا بابت پاکستان نا کڑد و آزموندہ نا بابت ملک انا نکتہ نظر ءِ پیدوار کیک۔ اسیجا وڑاٹ باہوٹ آتا بابت جہانی فورم نا اڈتننگ تدوک آ چل سال اٹی اوغان ایلم و ایڑھ تیکن پاکستان نا خلقت نا جوزہ و پاکستان نا است بھلنی و انسانی ہمدردی نا بنداو آ امداد آتا اعتراف ءِ۔ وزیراعظم جنیوا ٹی اڈ کننگ اٹ چندی ملک آتا تینا ہم منصب و اقوام متحدہ نا سرکڑدہ غاتون ہم اوڑدہی کیک و اقوام متحدہ نا سیکرٹری جنرل نا کنڈآن تروک آ دے انا اِرغ اٹی ہم شرکت کیک۔
