پشاور۔ 16 دسمبر (اے پی پی) وزیراعلیٰ خیبر پختونخوا محمود خان دوشنبے نادے آ چناتے پولیو آن بچفنگ نا پڑی کنفسا انسداد پولیو مہم نا بناءِ کرے، دا پولیو مہم اٹی خیبر پختونخوا ٹی پنچ سال اسکان نا 67لکھ چناتے پولیو آن بچفنگ نا پڑی کنفنگک، پولیو مہم اکن 22 ہزار آن زیات ورکرز ٹیم ٹہیفنگانے، داوخت آ میڈیا تون گپ و تران کرسا صوبائی وزیراعلیٰ پارے کہ خیبر پختونخوا پوسکن آ پولیو کیس آتا مون آ بننگ بے کچ است ہسون مننگ تون اوار اوار اوفتے کن بھاز تکلیف و گڑتی اسے نا سوب ءِ، اوپارے کہ صوبائی حکومت انسداد پولیو نا بابت تینا زمواری تیان جوانی اٹ معلومدار ءِ و دا زمواری تا پوروی کن غٹ وسیلہ غاتے کاریم اٹ اتنگ انگ ءِ، وزیر اعلیٰ پارے کہ انسداد پولیو ٹی بھلا اڑاند پولیو پڑی تیان نمن لمہ و باوہ غاک ءُ ولے صوبائی حکومت اوفتے تون ہچ ءُ سختی اس کننگ خواپک بلکن اوفتے ہیت وگپ انا کمک اٹ پہہ کرسا تینا چناتے پولیو نا پڑی کنفنگ آ رضامند کننگ انگ ءِ۔ اوپارے کہ داحکمت عملی نا گچین بھرم مون آ بننگ ءِ، اوپارے کہ ساڑی آ پولیو مہم اٹی بھلو کچ اسے آ چناتے پولیو نا پڑی کنفنگک و دا ہیت ءِ پک کننگک کہ پنچ سال اسکان نا اسہ چناس ہم پڑی کُننگ آن محروم مف، اوپارے کہ سال 2019ء ٹی بنوں و قطبی وزیرستان نا علاقہ غاتیان 54پولیو کیس رپورٹ مسنو ہرانئے بیرہ حکومت بلکن او علاقہ غاتا باتی تیکن ہم فکر انا ہیت اسے۔ اوپارے کہ پولیو نا برخلاف جاری جنگ مچ آ قوم انا جنگ ءِ و دا جنگ اٹی سرسہبی کن ہر شاری ءِ تینا کڑد ءِ ادا کروئی مریک۔ اوپارے کہ ساڑی آ مہم ءِ سرسہب کننگ کن ہم غٹ اسٹیک ہولڈرز و شاری تے مون آ بروئی مریک۔ اوپارے کہ ملک و صوبہ ءِ پولیو آن پاک کننگ نا عمل اٹی بھلو قربانی اس تننگانے ہرانا کساس ءِ دا ہیت آن خلنگ مریک کہ دا عمل اٹی 76 نا خڑک خلقت شہید مسنو۔
