ایبٹ آباد۔ 16 دسمبر (اے پی پی)بنجائی وزیر دیر و بجلی عمر ایوب خان پارینے کہ وزیراعظم عمران خان جیرتی و نرزور ءُ راہشون اسے، اوملک ءِ تنکی تیان کشنگ نا لائخی تخک، پاکستان ءِ زرداری آن زیات مسلم لیگ (ن) نسخان تس و ملک وام تا بھاریم نا کیرغ آن بس، 10 کروڑ روپئی نا خڑچ آن کیالہ، بٹالہ، گھوڑا بازگراں تون اوار ہر خلقءِ گیس بجلی نا عملی ڈٹ ایتنہ، پاکستان تحریک انصاف نا ہندی سرکڑدہ غاتا راہشونی اٹ غٹ علاقہ غاتے ٹی شونداری ڈٹ آتا بناءِ کینہ۔ او تحصیل حویلیاں نا یونین کونسل گڑھی پھلگراں نا علاقہ بٹالہ ٹی گیس ڈٹ انا بناءِ کننگ نا وخت آ السی جلسہ غان تران کریکہ۔ جلسہ غان صوبائی وزیر خور الحاج قلندرخان لودھی و مسکوہی باسک صوبائی اسمبلی نثار صفدر خان ئسک ہم تران کریر۔ عمر ایوب خان پارے کہ ہراخلقت پاکستان تحریک انصاف و وزیراعظم عمران خان نا کماشی ٹی تینا منشور آسلوک ءُ و ملک ءِ معاشی و سیاسی تنکی تیان کشنگ کن کوشست کننگ ءُ، پاکستان ءِ معاشی وڑاٹ مسلم لیگ (ن) زرداری حکومت آن زیات نسخان تس، مسلم لیگ (ن) نا حکومت ہراتم اقتدار آن پیش تما تو زرمبادلہ بیرہ اِراہفتہ نا ئس۔ عمر ایوب خان پارے کہ پاکستان تحریک انصاف نا حکومت اسہ سال اٹی لوڈشیڈنگ ءِ چٹفے و اینو ملک انا ہر خلق اٹی روشنائی ءِ، وزیراعظم عمران خان جیرت مند ءُ لیڈر اسے، ہراتم بھارت پاکستانی سیم تا خلاف ورزی ءِ کرے تو ننا لیڈر اِرادے اٹی بھارت ءِ پبی ورندی ترسا قوم انا کاٹم ءِ گمر اٹ بڑزکرے۔ عمر ایوب خان پارے کہ ہراحلقہ غاتے ٹی تحریک انصاف نا نمائندگی اف ہموجاگہ نا پارٹی سرکڑدہ غاتا سلاہ سوج اٹ شونداری کاریم کیر۔ پاکستان تحریک انصاف نا تنظیمی سرکڑدہ ہراوڑپارٹی کن کاریم کننگ ءِ داڑان کارندہ غاتا است بڈی مریک و الس نا متکن آ ویل آک ایسرمریرہ۔ صوبائی وزیر خور الحاق قلندر لودھی تران کرسا پارے کہ صوبائی حکومت تحصیل حویلیاں نا الس کن اِرا ارب روپئی نا کورین حکومت آن واٹر سپلائی اس ایسونے ہراڑان سرکل حویلیاں نا گیشتر علاقہ غاتے ساف دیر دوبریک۔ اوپارے کہ چار و نیم کروڑ نا خڑچ آن حویلیاں ٹی ریسکیو 1122نا ڈٹ گچین کاری وعدہ نا پوروی اسے ہرا اسہ سال اٹی پورو مریک۔ مسکوہی باسک صوبائی اسمبلی نثار صفدر خان پارے کہ ہراخلقت حلقہ این۔15 و پی کے 37 نا الس آ 10 سال آن حکومت کننگ ءُ اوفک الس ءِ وعدہ غاتیان بیدس ہچ اس تتنو، اینو تحریک انصاف نا وزیر آک الس نا عملی خذمت ءِ کننگ ءُ تو او خلقت ءِ تکلیف مننگ ءِ۔
