اسلام آباد۔ 16 فروری (اے پی پی) مسلم لیگ (ن) نا سینیٹر لیفٹیننٹ جنرل (ر) عبدالقیوم پارینے کہ وزیر اعظم محمد نواز شریف تون اوار مچ آ قوم ہربہاآ دہشت گردی ئِ امنا کپک۔ ریڈیو پاکستان تون ہیت وگپ کرسا او پارے کہ مسلم لیگ (ن) نا حکومت ، سیکورٹی فورس و مچ آ قوم دہشت گردی نا چٹفنگ کن یکجائُ و تینا ملک ئِ دہشت گردی نا حوالہ کپنہ۔ اوپارے کہ پاک فوج پاکستان آن دہشت گرد آتا نیٹ ورک، اوفتا ٹھکانہ و مواصلات نا نظام ئِ پوروی وڑاٹ بھس کرینو و اوغانستان نا نزوری نا سوب دہشت گرد ہموڑے ساڑی ئُ و سیم ئِ پار کرسا پاکستان اٹی پترینگرہ ہرانا سوب اسٹ اِرا واقعہ غاک رونما مریرہ ، اوپارے کہ ہڑتوم آ ملک آتا نیام اٹ سیمی نظام ئِ پین منظم کننگ نا سخت گرج ئِ۔ جنرل عبدالقیوم پارے کہ پاکستان آن دہشت گردی ئِ 80 درسد چٹفنگانے و ننا حکومت و سیکورٹی فورس آک دانا پوروی اٹ چٹفنگ کن پرعزم ئُ۔ بھارتی رویہ نا بابت ہیت وگپ کرسا اوپارے کہ بھارت دہشت گردی آن اسہ گام اس ہم پدی سلنگ کن تیار اف او پاکستان ئِ نزور کننگ خوائک و او تینا ارادہ غاتے ٹی وخت اس ہم سرسہب مفک۔ اوغانستان نا بابت چست کروک آ سوج انا ورندی ئِ ترسا اوپارے کہ پاکستان نا الس اوغان قوم اتون مابت تخک و ہنداسوب ئِ کہ لکھ آ اوغان مہاجر پاکستان اٹی پناہ ہلکونو وپاکستان اٹی ہروڑنا کاروبار ہم کننگ ئُ۔ اوپارے کہ اوغانستان ئِ دہشت گردی نا چٹفنگ کن سیمی جھیڑہ و تینا تہہ نا حالیت آتے گچین جوڑ کننگ نا گرج ئِ ۔
