کوءٹہ ۔ 13 دسمبر (اے پی پی) ترجمان بلوچستان صوبائی حکومت لیاقت شاہوانی پارینے کہ ننے دنیا نا پوسکن آ چیلنج آتا مقابلہ ءِ کننگ و تینا نقطہ نظر ءِ دنیا نا مون آ وخت آ پیش کننگ کن میڈیا نا غٹ پوسکن آ الیکٹرونک ذراءع ءِ کاریم اٹ اتوئی مریک داڑکن ننے دا بشخ انا پوسکن آ سائنسی باندات نا تربیت ءِ ہلنگ نا اہم گرج ءِ ۔ داخیال آتا درشانی ءِ او جمعہ نادے آ ڈائریکٹر جنرل تعلقات عامہ نا دفتر نا دورہ ٹی آفیسر و عملہ تون گپ و تران کرسا کرے ۔ داوخت آ ڈائریکٹر تعلقات عامہ شہزادہ فرحت احمد زئی ہم ساڑی ئس ۔ ترجمان صوبائی حکومت پارے کہ الیکٹرانک میڈیا ٹیاینو سوشل میڈیا ترند ءِ ہنداخاطران ننے دا میڈیا نا غٹ باندات آتیا دسترس دوئی کیک اوپارے کہ ڈی جی پی آر اٹی سوشل میڈیا سیل اس ٹہیفنگ انگ ءِ ہرانا ٹہیفنگ آن صوبائی حکومت نا بناکروک شونداری عمل گچین و وخت آ کوریج آن حکومت و الس نا نیام اٹ رابطہ غاتے ٹی پین سوگوی بریک و گڈ سر اٹی حکومتی کارکڑدگی گچین وڑاٹ خلقت نا مون آ بننگ کیک اومحکمہ نا کارکڑد نا ستاءِ کرسا پارے کہ پوسکن آ ٹیکنالوجی نا تربیت نا کمتی ءِ پورو کننگ کن محکمہ نا آفیسر و عملہ ءِ تربیت فراوان کننگ نا پروگرام آ عملدرآمد کننگ انگ ءِ اومحکمہ نا توسط اٹ پریس و حکومت نا نیام اٹ خوشگوار تعلقداری تا ستاءِ کرے و پارے کہ صوبائی حکومت صحافی تے ہروڑ کمک فراوان کننگ ءِ و اوفتا راجی آسراتی کن ہروڑ گام گیج کننگ انگ ءِ ۔ داوخت آ آفیسر و عملہ اودے مون تروک ویل آتیان معلومدار کریر ہراٹی میڈیا الاءونس نا فراوانی کن ہیت وگپ کننگا اودے پاننگا کہ محکمہ مچ آ صوبہ ٹی صوبائی حکومت نا کارکڑدگی ءِ کوریج کیک وخت اس کہ ڈی جی پی آر آفس اٹی صوبائی حکومت نا پبلسٹی کن بیست و چار گھنٹہ عملہ فرض سرانجام تننگ ءِ ولے ماہانہ پیکج آک بے کچ کم ءُ ہنداخاطران صوبائی حکومت محکمہ کن چل درسد میڈیا الاءونس نا فراوانی نا پڑو ءِ کے ترجمان صوبائی حکومت دا ویل آتے کن وزیراعلیٰ بلوچستان تون ہیت وگپ کننگ نا باوری کرفینے ۔
