فیصل آباد ۔ 13 دسمبر (اے پی پی) بنجائی پارلیمانی سیکرٹری ریلویز میاں فرخ حبیب پارینے کہ ورناک قوم انا آخبت و پی ٹی آئی نا سرمایہ ءُ، پی ٹی آئی کرپشن آن فری پاکستان اس جوڑ کننگ کن جہد کننگ ءِ، ورناک عمران خان ءِ وزیراعظم آف پاکستان جوڑ کننگ اٹ تینا تاریخی کڑد ءِ ادا کرینو ۔ داہیت ءِ او تینا دفتر اٹی کارندہ غاتون گپ و تران کرسا پارے ۔ اوپارے کہ پی ٹی آئی نا حکومت لس بندغ نا زند اٹی آسانی ودی کننگ کن عملی گام گیج کننگ ءِ ۔ اوپارے کہ ملک اٹی بدلی نا بنامسنے اینو ہم ورناک وزیراعظم عمران خان تون ہم کوپہ سلوک ءُ ۔ راج اٹی بدلی کن ورناک تینا کڑد ءِ ادا کیر و نزور تپہ غاتون تفر نیز تنظیم نا سوگوی و پارٹی نا سرجزآتے تالان کننگ کن ہراول دستہ نا کڑد ءِ ادا کیر ۔ اوپارے کہ قوم شریف برادران نا کرتوت آتیان جوان واقف ءُ ۔ شہباز شریف اداکاری و ڈرامہ گازی کرسا قوم ءِ پین بے وقوف کننگ کپسہ ۔ اوپارے کہ وزیراعظم قوم اتون ہرا وعدہ غاتے کریسس کہ ملک انا پلوک آ قومی دولت ءِ ملک اٹی پدی اتینہ ، دا عمل بناکرینے ۔ وزیراعظم عمران خان نا کماشی ٹی تحریک انصاف نا حکومت مشکل حالیت آتیان پد ہم ملک ءِ مشکلات آتیان کشسا سہی سمت انا کنڈادرینے ہرانا بھرمک الس ءِ زوت ملنگ بناکیرہ وخت اس کہ مستین نا حکومت آک ریکارڈ وام ہلکر نیز ڈالر و کبینی ءِ مصنوعی وڑٹ کنٹرول کننگاسس داکان بیدس مستین نا حکومت آتا کنڈآن گردشی وام تیٹی ہم ریکارڈ ودکی کننگا ۔
