راولپنڈی ۔ 13دسمبر (اے پی پی) بنجائی وزیر ریلوے شیخ رشید احمد پارینے کہ ایم ایل ون اکن پاکستان و چین نا حکومت جتا جتا ءُ کمیٹی جوڑ کرینو، ایم ایل ونءِ چین ہی جوڑ کیک، ایم ایل ٹو کن روس ہم است خواہی ظاہر کرینے، ایم ایل ٹو ، تھری و فور اکن انتس کہ برے اونا خیرمقدم ءِ کینہ، ہفتہ نادے آ 25سال آن پد جلوسر کلر ٹرین نا بناءِ کننگک، تیز گام شکست نا پیش کروک آ انکوائری رپورٹ متنازعہ ءِ ، بروک آ 10 دے اسکان بے کنڈ ہلوک رپورٹ اس پورو کننگک، مریم نواز و فریال تالپور نا بابت کابینہ غان حق اٹی فیصلہ بننگ ءِ خنپننگ اُٹ، ہرا5کمپنی تا ڈائریکٹر بلاول ءِ اوفتا پلی بارگین مارچ اسکان بریک ۔ او جمعہ نادے آ راولپنڈی آن سرگودھا ٹریک انا معائنہ نا بناءِ کننگ آ راولپنڈی ریلوے اسٹیشن آ میڈیا تون گپ و تران کریکہ ۔ سی ای او ریلوے اعجاز احمد، ڈویژنل سپریٹنڈنٹ ریلوے راولپنڈی سید منور شاہ تون اوار ریلوے نا ایلو کمامدارآک ساڑی ئسر ۔ بنجائی وزیر ریلوے شیخ رشید احمد خاص ءُ کوچ اسے ٹی تولسا راولپنڈی آن سرگودھا ٹریک انا معائنہ ءِ کرے ۔ بنجائی وزیر ریلوے شیخ رشید احمد پارے کہ ریلوے نا آخیریکو ڈویژن نا معائنہ ءِ کننگ اُٹ داکان مست ریلوے نا غٹ آپریشنل ڈویژن تا ٹریک انا معائنہ ءِ کرینٹ ۔ اوپارے کہ لاہور اٹی جلو سر کلر ٹرین نا بناءِ کیہی سال آتیان پد کننگ اُن، ننا کوشست مریک کہ دا ٹرین نا روٹ اٹی رائیونڈ ءِ ہم اوار کننگے دا ہرے نا خواست اسے ۔ اوپارے کہ اول نن ریلوے ءِ نسخان آن کشنگ کن 5سال انا ہدف ءِ مقرر کریسن ولے ہرا رفتار برجاءِ اوٹی 3سال اٹی نسخان نا مون ءِ تورنہ دا سرسہبی ٹی ریلوے نا آفیسر و مزور آتا دے ونن نا خواری اوار ءِ ۔ اوپارے کہ وزارت ریلوے نا کنڈآن وزیراعظم عمران خان ءِ ریلوے نا گریڈ اسٹ آن 16اسکان ملازم آتے اپ گریڈ کننگ نا سمری مون تننگانے ۔ اوپارے کہ عدالت آن حکم امتناعی نا چٹنگ تون ہی غٹ ٹی ایل وے ملازم آتے آخبتی کننگک ۔ بنجائی وزیر شیخ رشید احمد پارے کہ داوخت آ پاکستان ریلوے 138 مسافر ٹرین و 12آن 15مال گاڈی ہردے نا بنداو آ سرسہبی اٹ چلینگ انگ ءُ ۔ کراچی ٹی ہم مال گاڈی تا کچ ءِ ودفنہ ۔ اسہ سوج اسے نا ورندی ٹی اوپارے کہ اسہ گچین مروک حکومت اسے نا برخلاف غیر آئینی و غیر جمہوری وڑتے کاریم اٹ اتنگ انگ ءِ ۔ اوپارے کہ غٹ سیاسی جماعت آتا زمواری ءِ کہ اسہ امنائی چیف الیکشن کمشنر اسے آ امنا کیر ۔ اوپارے کہ بھارت اٹی انت کہ گام گیج اس ہرفنگ انگ ءِ اودے مچ آ دنیا خننگ ءِ، دراصل نریندر مودی مسلمان تے وونٹ انا حق آن محروم کننگ خواہک ۔
