کوئٹہ۔ 16 فروری (اے پی پی) پشتونخوا ملی عوامی پارٹی نا کنڈآن تحصیل چمن نا ضلعی ، علاقائی و بنائی یونٹ آتا عمومی دیوان تدوک آ دے اڈ ہلک۔ دیوان اٹی صوبائی وزیر و صوبائی ڈپٹی سیکرٹری ڈاکٹر حامد خان اچکزئی ، باسک قومی اسمبلی و نائب صدر قہارودان ، علاﺅالدین خان کلکوال ، صوبائی ڈپٹی سیکرٹری ، میئر چمن و ضلعی ایگزیکٹو صلاح الدین اچکزئی آن بیدس کارندہ غاک بھلو کچ اسے ٹی ساڑی ئسر۔ دیوان اٹی پارٹی نا ضلعی و علاقائی کمیٹی و یونٹ آتا کارگذاری نا بابت معاملہ و 20 تاریخ آ پشین اٹی وزیراعظم نا گمانی لس جلسہ نا بابت انتظامی معاملہ غاتا جاچ ئِ ہلنگا و دا بابت جتا کمیٹی تے جوڑ کننگا۔ دیوان آن تران کرسا ڈاکٹر حامد خان اچکزئی ، قہارودان و ایلو ترانکار آک پاریر کہ پشتونخواملی عوامی پارٹی ساڑی صوبائی حکومت نا دوراٹی قلعہ عبداللہ خاص کر چمن شار اٹی الس نا شونہالی و شونداری کن ہرا گام گیج آتے کرینے اوفتا گدرینگوک آ 70 سال اٹی مثال ملیپک۔ خاص کر کوئٹہ چمن روڈ انا جوڑ جاڑ ہرا گدرینگوک آ حکومت آتا 10 سال اٹی پورو مننگ کتو ئِ 2 سال انا وخت اٹی 7 ارب روپئی نا خڑچ آن پورو کرسا نشان تس بلکن چمن شار و علاقہ ٹی امن وایمنی ئِ ہم اڈ تس۔ اوپارے کہ کوئٹہ چمن روڈ ہراڑآ شام تمنگ آن پد سفر کننگ ممکن ہلوکہ دا شاہراہ ئِ سفر کن رکھوک جوڑ کننگانے۔ داکان بیدس علاقہ ٹی روڈ و ڈیم تا جوڑ جاڑ ، اسکول و ہسپتال آتا اڈتننگ وکاریز آتا صفائی نا کاریم ئِ ہم پورو کننگا۔ اوپارے کہ چشمہ ڈیرہ اسماعیل خان ژوب ٹرانسمیشن لین انا منظوری تننگانے ہرا کہ 7 ارب روپئی نا خڑچ آن اِراسال اٹی پورو مریک۔ کوئٹہ ئِ دیر انا فراوانی کن منگی ڈیم انا جوڑ جاڑ آن بیدس پٹ فیڈر کینال آن کوئٹہ ئِ دیر انا فراوانی کن 7 ارب روپئی نا ڈٹ و کوئٹہ ماس ٹرانزٹ نا ڈٹ ئِ ہم سی پیک اٹی اوار کننگانے داڑتون اوار اوار کوئٹہ شاراٹی 90 درسد اسکان امن نا بحالی ٹی سرسہبی آن بیدس کوئٹہ خضدار ، کراچی ہائی وے آ سفر ئِ رکھوک جوڑ کننگا۔ بنجائی حکومت نا کمک اٹ 28 آن 30 چنکا ڈیم تا جوڑ جاڑ نا ڈٹ آتیا ہم سجفنگ انگ ئِ۔ کوئٹہ ٹی 5 ارب نا خڑچ آن شونداری کاریم تیان بیدس ہر ڈویژنل ہیڈ کوارٹر اٹی 50 کروڑ و ڈسٹرکٹ ہیڈ کوارٹر اٹی 20 کروڑ نا خڑچ آن شونداری ڈٹ آتیا کاریم برجاہ ئِ۔
