اسلام آباد ۔ 13 دسمبر (اے پی پی) وزیراعظم نا سلاہکار واپار عبدالرزاق داءود پارینے کہ پاکستان سویلی ایشیا نا معاشی شونداری و علاقائی انضمام نا تغ انا تعبیر کن کلیدی کڑد ادا کننگ ءِ ۔ سارک چیمبر آف کامرس اینڈ انڈسٹری نا سینئر نائب صدر افتخار علی ملک ءِ بروک آ اِرسالہ مد اکن سارک چیمبر نا صدر پندار مننگ آ تینا مبارکبادی نا کلہو اٹی سلاہکار واپار پارے کہ دا پنداری ڈیہہ ٹی واپار نا مون آ دننگ کن افتخار علی ملک نا 29سالہ شاندار خذمت آتا اعتراف وپاکستان کن شرف اسے ۔ اوپارے کہ پاکستان سارک انا پلیٹ فارم آن علاقائی واپار نا مون آ دننگ و شونداری آ یخین تخک انتئے کہ ہندا ڈیہہ ٹی امن کن مون آ ہِننگ نا عمل نا قابل کسر ءِ و پاکستان دارداٹ تینا پبی کڑد ءِ ادا کرسا کیک ۔ دا ڈیہہ انسانی و قدرتی وسیلہ غاتیان شپ ءِ ہرافتیان پبی فائدہ ہرفنگ نا گرج ءِ ۔ عبدالرزاق داءود پارے کہ سارک سوشل چارٹر دارداٹ مون آ ہِننگ نا حقی کسر ءِ، پاکستان دارداٹ غٹ گام گیج آتا پورو مخ تفی ءِ کیک و جان جوڑی و تعلیم نا بشخ آتے ٹی تنظیم نا زیات آن زیات کڑد انا گرج ءِ ۔ سارک چیمبر نا سینئر نائب صدر افتخار علی ملک عبدالرزاق داءود نا منت واری ءِ ہرفسا باوری کرفے کہ او علاقائی واپار نا مون آ دننگ کن تینا غٹ تر توانائی تے کاریم اٹ اتیک، شونہال سویلی ایشیا نا جوڑ کننگ اٹی پاکستان نا کڑد المی ءِ ۔ اومستی پارے کہ واپاری خڑچ آتے کم کننگ نا سخت گرج ءِ تانکہ سارک ملک آتا نیام اٹ واپار ءِ زیات آن زیات حد اسکان مون آ دننگ مرے ۔ اوپارے کہ پاکستان اقتصادی واک اس مننگ کن غٹ وسیلہ غاتیان مالامال ءِ و گرج بیرہ داہیت انا ءِ کہ پبی عزم، ہمت و خلوص اتون ہدف آتے پک و سمت انا تعین ءِ کننگے ۔ پاکستان نا بھلا معدنی وسیلہ ملک ءِ معاشی ویل آتیان نجات ترفنگ اٹ اہم ءُ کڑد اس ادا کننگ کیک ۔ تینا موقف نا درشانی ءِ کرسا افتخار ملک پارے کہ وزیراعظم عمران خان سویلی ایشیا ٹی واپار و صنعت نا مون آ دننگ کن تینا گچین سرکڑدہ لاءخی و دوئی وسیلہ غاتا کاریم اٹ اتنگ ءِ و او بھاز پراومیت ءِ کہ دا کوشست آک بارآور مریرہ ۔
