اسلام آباد ۔ 12 دسمبر (اے پی پی) بنجائی وزیر ریلوے شیخ رشید احمد پارینے کہ اہم دے تا بنامسنے، بروک آ منہ دے اٹی پلی بارگیننگ نا بھاز انگا کیس آک بریرہ، الیکشن کمیشن نا ٹہیفنگ کن امنائی ملک و قوم اکن گچین مریک، 2013ء و 2018ء نا نتیجہ غاتے ہم امنا کننگتو، داروایت بایدے چٹے، کٹر تو الیکشن کمیشن نا ہچ کس ثانی مفک اگہ کٹفر تو دھاندلی نا ہچ ءُ مثال اس مفک دا دوہرا معیار بایدے چٹے ۔ او پنچ شنبے نادے آ بحریہ یونیورسٹی ٹی دود آن تران و صحافی تتون گپ و تران کریکہ ۔ بنجائی وزیر ریلوے شیخ رشید احمد پارے کہ پاکستان اٹی وسیلہ غاتا کمتی اف، ورناک تینا کڑد ءِ پبی وڑاٹ ادا کیر ۔ اوپارے کہ حکومت ملکی شونداری کن وسیلہ غاتے سہی وڑاٹ کاریم اٹ اتنگ کن تینا غٹ تر لاءخی و وسیلہ غاتے کاریم اٹ اتنگ ءِ ۔ اوپارے کہ ہراتم ملکی زرگزران سوگو مریک تو ملک شون ہلیک، ننے تینا افرادی قوت ءِ سہی وڑاٹ کاریم اٹ اتوئی مریک ۔ اوپارے کہ پاکستان اٹی ورناتا جم اٹنگا آبادی نا 60 درسد ءُ، ننے ورناتیا خصوصی چکار کروئی ءِ تانکہ ورناک ننا واک مرسا ملکی جوڑ جاڑ و شونداری ٹی اہم ءُ کڑد اس ادا کیر ۔ ورناک ننا روشنا آخبت نا ضمانت ءُ ۔ بنجائی وزیر ریلوے پارے کہ افرادی قوت نا لحاظ اٹ پاکستان نمان ہند اس تخک، پیشن نا ملک آتے ٹی ہم افرادی قوت پاکستانی فراوان کننگ ءِ و ملک انا تہہ ٹی ہم ننا افرادی قوت نا ہچ ءُ ثانی اس اف ۔ اوکان پد میڈیا تون گپ و تران کرسا اوپارے کہ اہم ءُ دے اسے پاکستان اٹی پلی بارگیننگ نا بھاز انگا کیس آک بننگ والا ءُ ۔ اوپارے کہ وکیل آک دروغلط ءُ کاریم اس کریر داڑان وکیل آتا تینا امیج خراب مسنے ۔ اوپارے کہ الیکشن کمیشن بایدے امنائی اٹ پورو مرے ۔ 2013ء و 2018 ء نا الیکشن نا نتیجہ غاتے امنا کننگتنے داروایت بایدے چٹے ۔ اوپارے کہ حکومت الس ءِ کبینی ، بے روزگاری ، بجلی و گیس انا بل آتا ویل آتیان نجات ترفک ۔ اوپارے کہ بھارت شہریت نا جھیڑہ ہی کانود نا کمک اٹ بیرہ ہندوتے آباد کننگ خواہک ایلو مذہب آتا ہموڑے ہچ ءُ گنجائشت اس اف ۔ شہریت نا بابت مسلمانک 10 نمبر آہم بفسہ ۔ داہرا نظریہ ءِ ، نریندر مودی فاشٹ اس مرسا مون آ ہِننگ ءِ ، ہرابھارت اٹی سکھ، مسلمان تتون اوار غٹ اقلیت آتے کن اسہ بھلو خطرہ سے ۔
