اسلام آباد ۔ 12 دسمبر (اے پی پی) وزیراعظم عمران خان پارت کرینے کہ پبلک ورکس ڈیپارٹمنٹ نا ملازم آتا تنخواہ تا باندات سسٹم پراڈکٹ پرافیشینسی (ایس اے پی) نظام نا رداٹ منظم کننگے تاکہ دا بابت ملازم آتے مون تروک ویل آتا گچین ایسری ءِ پک کننگ مرے ۔ اوداپارت ءِ پبلک ورکس ڈیپارٹمنٹ و وزارت ہاءوسنگ نا باندات نا بابت دیوان نا کماشی ءِ کرسا تس ۔ دیوان اٹی وزیر ہاءوسنگ چوہدری طارق بشیر چیمہ، سیکرٹری ہاءوسنگ ڈاکٹر عمران زیب، سیکرٹری خزانہ نوید کامران بلوچ وایلوسینئر آفیسر آک ساڑی ئسر ۔ سیکرٹری ہاءوسنگ ڈاکٹر عمر ان زیب پبلک ورکس ڈیپارٹمنٹ نا باندات خاص کر ادارہ نا کارکڑدگی نا گچینی نا چرجوئی ٹی کروک آ گام گیج ، ڈیپارٹمنٹ نا مالی وسیلہ و ملازم آتا تنخواہ تا بابت پیش بروک آ ویل آتیان وزیراعظم ءِ معلومدار کرے ۔ وزیراعظم عمران خان پارت کرے کہ پبلک ورکس ڈیپارٹمنٹ نا ملازم آتا تنخواہ تا باندات سسٹم پراڈکٹ پرافیشینسی (ایس اے پی ) نظام نار داٹ منظم کننگے تانکہ دا بابت ملازم آتے مون تروک ویل آتا گچین ایسری ءِ پک کننگ مرے ۔ سیکرٹری ہاءوسنگ پی ڈبلیو ڈی نا کارکڑدگی ءِ گچین کننگ و انفارمیشن ٹیکنالوجی ءِ کاریم اٹ اتسا افرادی قوت نا گچین کاریم اٹ اتنگ نا بابت ہم سرجم حوال تس ۔ سیکرٹری ہاءوسنگ وزیراعظم ءِ پارے کہ ادارہ نا کارکڑدگی نا گچینی، شفافیت ءِ پک کننگ و کرپشن نا چٹفنگ کن ٹھیکہ غاتا نظام اٹی ای ٹینڈرنگ و ای پروکیورمنٹ نا عمل اس درستی راستی کرفنگانے ۔ شونداری ڈٹ آتیا عملدرآمد آ پیش رفت نا بابت سیکرٹری ہاءوسنگ پارے کہ پبلک سیکٹر ڈویلپمنٹ پروگرام نا رداٹ داسال 46 ڈٹ آتیا عملدرآمد کننگ انگ ءِ ، دافتیان 36 ڈٹ آتے مالی سال نا ارٹ میکو سہ ماہی نا ایسراسکان پورو کننگک ۔ سیکرٹری ہاءوسنگ وزیراعظم ءِ کراچی و مری ٹی واقع وزارت ہاءوسنگ نا نہادی ملکیت آتے مثبت و کٹیا کروک وڑاٹ کاریم اٹ اتنگ نا بابت داوخت اسکان نا پیش رفت آن ہم معلومدار کرے ۔ دیوان اٹی سرکاری ملازم آتے کن سرکاری ہنکین تا کمتی ءِ پورو کننگ نا بابت گام گیج و بنجائی دارالحکومت تون اوار چندی شارتیٹی کثیر ڈغار تیا جوڑ مروک سرکاری اُراتا مثبت کاریم اٹ اتنگ نا بابت ہم گپ و تران کننگا ۔
