اسلام آباد۔ 11 دسمبر (اے پی پی) مزن وزیر عمران خان ءَ گوشت کہ کشت ءُُ کشاری شوبگ ءِ دیمروئی ءُُ دھکان آناں آسراتی ءِ پجاری حکومت ءِ اولی ترجی داتگیں کار آنی تہ ءَ ھوار انت، کشت ءُُ کشاری چیز آنی ودینگ ءِ واستہ ٹوھیں منصوبگ کنگ بوھگ ءَ انت، کشت ءُُ کشاری شوبگ ءَ چین ءِ تجروبت آں چہ سیت چست کنگ ءِ واستہ جزمیگ آں۔ اے ھیالانی درشانی آئی ءَ ایشیائی دیمروئی بینک ءِ شوبگ کوچگ دیمروئی ءُُ وردن ءُُ وراک ءِ رکھینگ ءِ سروک ڈاکٹر اکمل صدیق ءَ گوں تران کنگ ءِ ساھت ءَ کت آئی ءَ چار شمبے ءِ روچ ءَ مزن وزیر ءَ گوں گند ءُُ نند کت۔ گند ءُُ نند ءِ تہ ءَ بنجاھی وزیر برائے نیشنل فوڈ سکیورٹی مخدوم خسرو بختیار، بنجاھی وزیرِ منصوبگ بندی اسد عمر ءُُ تحریک انصاف ءِ سروک جہانگیر ترین ھم اے موہ ءِ سر ءَ ساڑی ات۔ آئی ءَ گند ءُُ نند ءَ دیمروئی کنوکیں ملک، دمگی تک آں ءُُ ھاسیں رنگ ءَ پاکستان ءَ کشت ءُُ کشاری شوبگ ءِ جیڈھ، ٹیکنالوجی، ایٹماسپئیر، نمب ءُُ ناس، ریسرچ اینڈ ڈویلپمنٹ ءُُ مارکیٹنگ ءِ آسراتی ءِ کمیگ ءِ سبب ءَ کشت ءُُ کشاری پڑ تاوان ءِ آماچ انت، ملک ءَ کشت ءُُ کشاری شوبگ ءِ دیمروئی ءِ واستہ ایشیائی دیمروئی بینک ءِ نیمگ ءَ چہ پجار کتگیں تکنیکی ءُُ ایندگر کمکی ءُُ آیوکیں باندات ءِ گامگیج آنی ھوالگ ءَ سرجمیں ھیالریچی کت۔ ایشی ءَ چہ ابید بلوچستان ءَ کشت ءُُ کشاری شوبگ ءِ دیمروئی ھاسیں رنگ ءَ کچھی کینال ءِ دمگ ءَ مزنیں کساس ءَ کارپوریٹ ایگریکلچر سہرا کنگ ءِ سر ءَ ھم چار ءُُ بچار کنگ بوھگ ءَ انت۔ مزن وزیر عمران کان ءَ ایشین ڈویلپمنٹ بینک ءِ نیمگ ءَ چہ کشت ءُُ کشاری شوبگ ءَ کمک ءِ پجارینگ ءِ پد ءَ شگر ءُُ منت گپت ءُُ گوشت کہ پاکستان تکنیکی کمک ءِ پجاری ءُُ ھاسیں رنگ ءَ کشت ءُُ کشار ءِ شوبگ ءَ انفارمیشن ٹیکنالوجی سہرا کنگ ءَ اے ڈی بی ءِ کمک ءَ را وش اتک کنت۔
