اسلام آباد۔ 11دسمبر (اے پی پی) صدر مملکت ڈاکٹر عارف علوی پارینے کہ پاک فوج و قوم انا کوشست آتیان دہشت گردی ءِ شکست مسنے و سیکورٹی حالیت آتا گچین مننگ نا سوب آن ملک اٹی سیل و سوات ءِ مون آ دننگانے، مقبوضہ کشمیر اٹی بھارت کشمیری تیا ظلم کننگ اٹی ءِ، بھارت اٹی مسلمان آتون اوار غٹ اقلیت آک بے رکھ ءُ، آزاد کشمیر نا زیبا انگا عکس آتا ندارہ نا کمک اٹ ہرا منظر کشی ءِ کننگانے داڑان جہانی کہول آ پاکستان نا گچین دروشم تالان مریک۔ داخیال آتا درشانی ءِ او چارشنبے نادے آ عکسی نمائش نا دود آن تران کرسا کرے۔ صدر مملکت پارے کہ دا عکس آتے ٹی پاکستان نا زیبا انگا ندارہ غاتا عکاسی ءِ کننگانے۔ دا عکس آتیان پاش ءِ کہ ننا ورناک اخہ دار لائخ ءُ وپاکستان اخہ در زیباءِ۔ دنیا نا ملک آتا چکر ءِ خلکونٹ ولے پاکستان آن زیات زیبا ہچ ءُ ڈیہہ اس اف۔ اوپارے کہ انسان زیبا انگا ندارہ غاتے ٹی اللہ تعالیٰ نا قدر ت ءِ پَٹک۔ اوپارے کہ سائنس و کلچر نا آجو مون آ دننگ آن تہذیب آک مون آ کارہ۔ اوورناتیا زور شاغا کہ او خواری کیر و دنیا ءِ کلہوسرکیر کہ پاکستان بھاز زیباءُ ملک اسے۔ اوپارے کہ آغا فاؤنڈیشن گلگت بلتستان اٹی ہندی بولی و دودوربیدگ نا رکھ اکن سفت نا قابل کڑد ادا کرینو۔ اوپارے کہ وادی سندھ انا تہذیب گچین انگا تہذیب آتیان اسٹ ءِ۔ پاکستان قدرتی وسیلہ و زیبائی نا ندارہ غاتیان مالامال ءِ۔ وادی ہنزہ ٹی عطا آباد جھیل قدرتی وڑاٹ جوڑ مسنے۔ 2014-15ء ٹی 15ہزار نا لگ بھگ سیل و سواتی گلگت بلتستان نا سیل ءِ کریر ولے پاک فوج و قوم انا کوشست آتیان سیکورٹی حالیت آتے ٹی گچینی بسنے۔ دہشت گردی ءِ شکست مسنے۔ دارداٹ اینخو نا سال مچ آ دنیا غان 22لکھ سیل و سواتی گلگت بلتستان نا زیبائی ءِ ہُننگ کن بسنو۔ داڑان دنیا ٹی پاکستان نا گچین دروشم تالان مسنے۔ اوپارے کہ آزاد کشمیر نا کودک خلقت نا ایلم تیا کنٹرول لین نا ایپار آن ظلم انا زی آ ظلم کننگ انگ ءِ۔ کشمیر ی الس تینا اُراتے ٹی گھٹ ءُ۔ اوفتا چناک اسکول آتیاہِننگ کپسہ۔ بھارت ہندوستان اٹی مسلمان تا تاریخ ءِ ٹکر کننگ و خسنگ نا کوشست کننگ ءِ ہراٹی او بے سہب مریک۔ بھارت آسام اٹی مسلمان تا رجسٹریشن ءِ چٹفے۔ مقبوضہ کشمیر اٹی 37 اے ءِ منسوخ کرے۔ بھارتی سپریم کورٹ بابری مسیت نا فیصلہ ٹی مسلمان تتون بیدادی کرے۔ داسہ بھارت انڈین سیٹیزن شپ ایکٹ اس منظور کرینے۔ دا گام گیج آک اقوام متحدہ نا کنونشنز و پاک بھارت تین پہ تینی معاہدہ غاتا خلاف ورزی ءِ۔ اوپارے کہ مقبوضہ کشمیر اٹی بھارت کشمیری تا دتر تے دریاٹی وہیفنگ ءِ۔ ہموڑے مواصلات نا ذریعہ غاتیا پابندی خلوک ءِ ہرانا سوب ہچ ءُ عکس اس پیشن بننگ کپک وخت اس کہ ایلو کنڈ ننا آزاد کشمیر ءِ ہراجاگہ نا زیباندارہ غاتا دا عکس آتے ٹی عکاسی ءِ کننگانے۔ اوپارے کہ وزیراعظم ڈیجیٹل اکانومی نا ہیت ءِ کرینے ہرانا کمک اٹ موبائل فون تا کمک اٹ پیسہ غاتا گدریفنگ، ورنا و زالبول آتے واکدار کننگ نا گام گیج کننگ ءِ۔ اوپارے کہ ساڑی ہی ٹی برطانوی شہزادی و اونا اُرائی پاکستان نا دورہ ءِ کریر، ہنداوڑ ہالینڈ نا ملکہ ہم پاکستان آ بس و پاکستان نا زیبا انگا ندارہ غاتے تینا خن تے ٹی خنا، ہنداوڑ داسہ پاکستان اٹی کرکٹ بحال مسنے۔ پاکستان و سری لنکا نا ٹیم تا نیام اٹ کرکٹ میچ مننگ ءِ۔ داحالیت آتیان جہانی کہول آ پاکستان نا گچین دروشم تالان مسنے۔ اوپارے کہ پاکستان روشنا آخبت نا کنڈا ہِننگ ءِ۔ داوخت آ بنجائی وزیر انفارمیشن ٹیکنالوجی ڈاکٹر خالد مقبول صدیقی و اسپیشل کمیونیکیشن آرگنائزیشن نا ڈائریکٹر جنرل میجر جنرل علی فرمان ئسک ہم تران کریر۔
