APP33-11 ISLAMABAD: December 11 - Dr. Zafar Mirza, Special Assistant to the Prime Minister for National Health Services, Regulations and Coordination witnessing the exchange of documents after signing between Government of Japan, Japan International Cooperation Agency (JICA) and the United Nations Children's Fund (UNICEF) as Government of Japan provides US$ 4.5 million grant aid to support the supply of the essential oral polio vaccine. APP

اسلام آباد۔ 11دسمبر (اے پی پی) وزیراعظم نا خصوصی کمکار جان جوڑی ڈاکٹر ظفر مرزا پارینے کہ حکومت جاپان پولیو ویکسین نا ہلنگ کن پاکستان ءِ 4.5 ملین ڈالر نا امداد فراوان کیک، داامداد آن پاکستان انسداد پولیو پروگرام دسمبر 2019ء آن نومبر 2020 ء اسکان پنچ سال اسکان نا 2کروڑ چناتے پولیو ویکسین کنفنگ نا ہدف ءِ دوئی کننگ کیک۔ داخیال آتا درشانی ءِ او چارشنبے نادے آ جائیکا و یونیسیف نا نیام اٹ معاہدہ غا دستخط آتا دود آن تران کرسا کرے۔ داوخت آ پاکستان انسداد پولیو پروگرام نا بڑزکو کمامدارآک ہم ساڑی ئسر۔ خصوصی کمکار پارے کہ 4.5 ملین ڈالر نا امداد آن پولیو آن بچفنگ نا ویکسین ہلنگک و ہندا امداد آن 22.69 ملین پولیو نا پڑی ہلنگک ہراڑان 2کروڑ چناتے پولیو آن بچفنگ نا پڑی کنفنگک۔ ہرانا پولیو نا چٹفنگ اٹی کلیدی کڑد اس مریک۔ اوپارے کہ پاکستان ءِ داوخت آ پولیو نا چٹفنگ اٹی مشکل حالیت آتا مون تروک ءِ ولے حکومت پاکستان ملک آن پولیو نا چٹفنگ کن پرعزم ءِ و ہروڑ کوشست کننگ ءِ کہ پولیو ویکسین غٹ چناتسکان سرمرے۔ پاکستان ءِ پولیو آن پاک ملک اس کننگ حکومت نا اولیت ءِ۔ اومستی پارے کہ حکومت جاپان نا پدریسہ امداد آن گچین آب انا پولیو مہم آک ممکن مریرہ و پنچ سال آن کم وئی چناتسکان پولیو ویکسین نا رسینگ ممکن مننگ کیک۔ اوپارے کہ پاکستان ساڑی آ سال تیٹی پولیو وائرس نا بھلو حد اسسکان مون ءِ تورینے ولے 2019ٹی پولیو مہم آتے ٹی بھلو کچ اسے آ انسداد پولیو پڑی تیان سلوک آ چناتا سوب آن پولیو کیس آک رپورٹ مسر۔ اینخو سال پولیو نا 94کیس رپورٹ مسنے ہرافتے ٹی زیات کیس خیبر پختونخوا غان رپورٹ مسنے۔ پاکستان انسداد پولیو پروگرام 2020ٹی پولیو وائرس نا چٹفنگ کن گچین پولیو مہم آتا ڈٹ بندی ءِ کرینے ہرافتے ٹی 3قومی انسداد مہم و 3ضمنی قومی مہم مریرہ۔ پولیو نا چٹفنگ کن چناتے ہر مہم اٹی پولیو آن بچفنگ نا پڑی کنفنگ سخت المی ءِ۔ ہراڑان نئے بیرہ پولیو وائرس ءِ توننگ ممکن مننگ کیک بلکن چناتا قوت مدافعت اٹی ہم ودکی مریک۔ حکومت جاپان 1996ء آن پاکستان اٹی پولیو نا چٹفنگ نا پروگرام آتون کمک کننگ ءِ۔ حکومت جاپان نا کنڈآن داوخت اسکان انسداد پولیو نا چٹفنگ کن 221.87ملین امریکی ڈالر (24,128ملین جاپانی ین) نا فنڈز فراوان کننگانے۔ داوخت آ پاکستان اٹی جاپانی سفارت خانہ ٹی تعینات یوسوک شیندو پارے کہ حکومت جاپان، حکومت پاکستان و یونیسیف تون اواری اٹ پاکستان آن پولیو نا چٹفنگ کن پرعزم ءِ و اومیت کننگک کہ حکومت پاکستان ملک آن دا موذی مرض انا چٹفنگ کن تینا کوشست آتے ٹی پین گچینی اتیک و الس ءِ دا موذی مرض انا آگاہی ٹی گچین کڑد ادا کیک۔

متعلقہ مضامینمصنف کی طرف سے مزید