لاہور۔ 11 دسمبر (اے پی پی) وزیر مملکت سیفران و انسداد منشیات شہریار آفریدی پارینے کہ اینٹی نارکوٹکس فورس تینا کچ اٹنگا نفری و کچ اٹنگا وسیلہ غاتیان پد ہم منشیات نا مکروہ دندہ زموار آتا چٹفنگ کن بے پرخ کارروائی ءِ برجاتخانن،و منشیات نا برخلاف آگاہی مہم اس چلیفسا اونا کاریم اٹ اتنگ اٹی کمتی اتنگ کن کوشست کننگ اُن۔ داخیال آتا درشانی ءِ او اینٹی نارکوٹکس فورس انا کنڈآن منشیات آتا ہُشنگ نا سالانہ دود آن تران کرسا کرے۔ دود اٹی سیکرٹری انسداد منشیات ڈائریکٹر جنرل اینٹی نارکوٹکس فورس میجر جنرل محمد عارف ملک (ہلال امتیاز ملٹری) کانود نافذ کروک آ ادارہ غاتا نمائندہ/گوازی و فیشن انڈ سٹری نا پنی آ شخصیت آتون اوار طالب علم و این جی او تا باسک آتابھلو کچ اس ساڑی ئسر۔ دود آن تران کرسا وزیر مملکت شہریار آفریدی منشیات آن پاک راج انا نظریہ ءِ عملی دروشم اس تننگ کن اینٹی نارکوٹکس فورس انا کوشست و کارکڑدءِ مون آ تخا۔ اوپارے کہ اے این ایف ہر سال ہلوک آ منشیات آتے تلف کننگ نادود اڈ ایتک ہرانا مسخت نم غٹ اتون اواری اٹ منشیات نا کاریم اٹ اتنگ و داڑان بچنگ نا درشانی ءِ کننگ نا ءِ۔ اگہ سول سوسائٹی نا باسک آک و حکومتی ادارہ غاتون اواری اٹ دا جہاد اٹی بشخ ہلیر تو کنے یخین ءِ کہ نن زوت دا خطرہ نا مون ءِ تورنہ۔ اوپارے کہ ہشوک آ منشیات آتے ملک انا تہہ ٹی کاریم اٹ اتنگ ئس یا ولدا ملک آن پیشن سمگل کننگارہ ہرافتے اینٹی نارکوٹکس فورس و ایلو کانود نافذ کروک آادارہ غاتا کارندہ غاک تینا فرض انا ادائیگی ٹی تینا زند گی ءِ خطرہ ٹی بٹسا ہلکر۔ دا سال ہشوک آ منشیات 55.144کلوگرام ہیرون و 10591.271کلوگرام چرس 616.521کلوگرام ہفیم، 62.0270 کلوگرام ایمفائٹائن، 117225بوتل شراب و 1110 مارفین نا انجکشن و 4006 مارفین نا گولی و 863.065کلوگرام بھنگ و 1.590 کلوگرام کوکین آ تالان ءُ۔ داکان بیدس سال 2019ء ٹی داوخت اسکان اے این ایف پنجاب منشیات آتا اسمگلر آتا برخلاف 374کیس درج کرے و 436 بندغ ءِ دزگیر کرے وخت اس کہ منشیات نا اسپیشل عدالت اِرا ڈوہدار آتے سزائے موت، 21 ڈوہدار آتے عمر قید و 341 ڈوہدار آتے پین سزاتے بنفے۔ فورس کمانڈر نا تران آن پد گورنمنٹ کالج یونیورسٹی لاہور نا طالب علم آک منشیات نا برخلاف خاکہ پیش کریر۔
