اسلام آباد۔ 11دسمبر (اے پی پی) چین پاکستان اقتصادی راہداری ڈٹ (سی پیک) نا رداٹ خیبر پختونخوا نا ضلع نوشہرہ ٹی واقع رشکئی اقتصادی زون آن اسہ لکھ 50 ہزار آن زیات نا روزگار نا وارخواہی ودی مریک، دا زون 2ہزار ایکڑ ڈغار آ تالان مریک۔ سی پیک اتھارٹی نا کمامدارآک اے پی پی ءِ پاریر کہ دا زون ءِ بنائی مرحلہ ٹی مسہ نیم کلومیٹر آ جوڑ جاڑی کاریم بناکرینے۔ اولیکو مرحلہ ٹی زون نا اسہ ہزار ایکڑ ڈغار آ پنچ سال اٹی مسہ مرحلہ غاتے ٹی ڈویلپ کننگک۔ 702 ایکڑ آ انڈسٹریل زون آن بیدس اولیکو فیز اٹی 159 ایکڑ، ارٹ میکو فیز اٹی 279 ایکڑ، مسٹ میکو فیز اٹی 264ایکڑ و 76ایکڑ ڈغار ءِ واپاری مسخت آتے کن ڈویلپ کننگک۔ دا زون اٹی الیکٹرانک اینڈ الیکٹریکل، آٹو موبائل اینڈ میکینکل، میوہ و خور انا گڑاتا پیکجنگ، ٹیکسٹائل سٹچنگ و نیٹنگ و ایلو تعلقدار صنعت آتے اڈ تننگ انگ ءِ و اوفتے کن آسراتی آ چکار کننگک۔ رشکئی اقتصادی زون نا علاقائی و جغرافیائی اہمیت ءِ مون آ تخسا او فک پاریر کہ دا صنعتی بستی آن بالی پٹ نا فاصلہ 65کلومیٹر، ڈرائی پورٹ 65کلومیٹر، ریلوے اسٹیشن 25کلومیٹر، سٹی سینٹر 15کلومیٹر، ہائی وے 5کلومیٹر و موٹروے باالکل گنڈوک ءِ۔ اسہ سوج اسے آ اوفتا پاننگ ئس کہ دا علاقہ ٹی صنعتی بستی نا اڈتننگ نا سلاہ صوبائی حکومت نا کنڈآن بسوسس و داٹی بنجائی حکومت نا کنڈآن ہچ نیام تمنگ تنے۔ رشکئی اسپیشل اکنامک زون مچ آ صوبہ نا جغرافیائی وت ءِ، ہرا معاشی لحاظ اٹ مچ آ ڈیہہ ءِ باہم سوگو کیک، صنعت کاری ءِ مون آ دننگ آن بے روزگاری ٹی کمتی، معاشی شونداری و شونہالی بریک صوبائی حکومت نا پاننگ ءِ کہ صنعتی پالیسی نا رداٹ چین وپاکستان نا تین پہ تینی رضامندی آن پک مروک آ مراعات آ عملدرآمد کرفینہ۔ کمامدارآتارداٹ سی پیک نا ارٹ میکو مرحلہ نا رداٹ پاکستان اٹی چین نا کمک اٹ صنعتی انقلاب اس بریک، دا مرحلہ ٹی ملک انا ہر چار آ صوبہ، گلگت بلتستان، فاٹا و آزاد کشمیر اٹی جم وڑاٹ 9 صنعتی زون جوڑ کننگک۔
