اسلام آباد۔ 11دسمبر (اے پی پی) صدر آزاد و جموں کشمیر سردار مسعود احمد خان 5اگست نا بھارتی گام ءِ جہانی کانود و جنیوا کنونشن نا پاش آن پاش خلاف ورزی گوندسا پارینے کہ بھارت نا جارحانہ پالیسی تا سوب بھارت اٹی رہینگوک آمسلمان تے ہم تینا بقا نا گڑتی مون تروک ءِ۔ او میری ٹائم سیکورٹی ورکشاپ نا چرجوئی ٹی نیشنل انسٹیٹیوٹ آف میری ٹائم افیئرز نا کنڈآن لاہور اٹی کشمیر نا ویل آ اڈ ہلوک آ اسہ دے ئی سیمینار آن تران کریکہ۔ ترجمان پاک بحریہ نا رداٹ سیمینار اٹی بھارت نا کنڈآن آرٹیکل A-35و 370 نا منسوخی و علاقائی و جہانی سلامتی آ اونا اثر آتا جاچ ءِ ہلنگا۔ صدر آزاد جموں و کشمیر دا سیمینار نا کمک اٹ کشمیر نا ویل ءِ تالان کننگ آ نیشنل انسٹیٹیوٹ آف میری ٹائم افیئرز ناانتظامیہ نا کوشست آتا ستاءِ کرے۔ چیئرمین کشمیر کمیٹی سید فخر امام کشمیر نا ویل ءِ کشمیری الس نا است خواہی تا رداٹ ایسر کننگ آ زور شاغا۔ سیمینارآن ڈاکٹر ہمابقائی، جسٹس ناصرہ جاوید، وائس ایڈمرل (ریٹائرڈ) خان ہشام بن صدیق، چیئرمین کشمیر کمیٹی سید فخر امام، سلیم بخاری و مسکوہی سفیر عارف کمال ئسک ہم تران کریر۔ سیمینار اٹی سلہہ بند فوج انا آفیسر، میڈیا نا نمائندہ غاک، بحریہ یونیورسٹی نا طالب علم و استاد آک، ہندی تھنک ٹینکس و ریسرچرز آک بھلو کچ اسے ٹی بشخ ہلکر۔
