اسلام آباد۔ 10 دسمبر (اے پی پی) صدر مملکت ڈاکٹر عارف علوی مقبوضہ جموں و کشمیر اٹی فوجی لاک ڈاؤن، کرفیو و انسانی حق آتا لتاڑ تیا گڑتی نا درشانی ءِ کرسا پارینے کہ پاکستان کشمیری تا حق خودارادیت و آجوئی نا پورو مخ تفی ءِ کیک، حکومت پاکستان انسانی حق انا رکھ و مون آ دننگ کن پرعزم ءِ۔ سے شنبے نادے آ انسانی حق انا جہانی دے انا وخت آ تینا کلہو اٹی صدر مملکت پارے کہ دادے ءِ اڈتننگ انسانی حق انا مون آ دننگ کن ننا پکا عزم انا پیدواری ءِ کیک۔ اوپارے کہ پاکستان کشمیری تا حق خودارادیت و آجوئی نا پورو مخ تفی ءِ کیک۔ صدر مملکت مقبوضہ جموں و کشمیر اٹی ملٹری لاک ڈاؤن، کرفیو ا نسانی حق آتا لتاڑنگ آ گڑتی نا درشانی ءِ کرسا زور شاغا کہ غٹ جہانی سرکاری، غیر سرکاری تنظیم، میڈیا و سول سوسائٹی مقبوضہ کشمیر نا حق انسانی نا رکھ و اوفتا حق خودارادیت کن تینا کڑدءِ ادا کیر۔ اوپارے کہ انسانی شرف نا پاسداری، انسانی حق انا رکھ، انسانی آجوئی و بریبری ءِ پک کننگ ننا مذہب و آئین نا بنداوی اصول آتیان اسٹ ءِ، حکومت پاکستان انسانی حق انا رکھ و مون آ دننگ کن پرعزم ءِ۔ صدر مملکت پارے کہ راج انا نزور و پدسلوک آتپہ غاتا رکھ انا کنڈا زیات آن زیات چکار کننگ نا گرج ءِ۔
