مچ آ ڈیہہ ٹی معاشی شونداری و شونہالی کن رکھ و سوگو اوغانستان اسے نا گرج ءِ، پین ملک اس پاکستان آن بیدس دا دعویٰ کننگ کپک کہ اونا اوغانستان تون تاریخی و سوگو تعلقداری ءِ و اوغانستان اٹی امن، سوگوی و شونہالی نا اخہ در است خواہی پاکستان ءِ ارے پین اسے اف
استنبول۔ 10 دسمبر (اے پی پی) وزیر خارجہ شاہ محمود قریشی پارینے کہ مچ آ ڈیہہ ٹی معاشی شونداری و شونہالی کن رکھ و سوگو اوغانستان نا مسخت نا دوئی کننگ نا گرج ءِ، پین ملک اس دا دعویٰ کننگ کپک کہ اونا اوغانستان تون او تاریخی و سوگو تعلقداری ءِ دُن کہ پاکستان نا ءِ و نئے دنیا ٹی پین ملک اسے اوغانستان اٹی امن، سوگوی و شونہالی نا داخہ در خواہش مریک ہراخہ در پاکستان ءِ ارے۔ داخیال آتا درشانی ءِ او استنبول اٹی ہارٹ آف ایشیاء نا ہشت می وزارتی کانفرنس آن تران اٹی کرے۔ ہارٹ آف ایشیاء استنبول پراسیس نا رداٹ داکانفرنس ترکی نا شار استنبول اٹی اڈ ہلک۔ وزیر خارجہ شاہ محمود قریشی داوخت آ تینا تران اٹی پارے کہ پین ملک اس دا دعویٰ کننگ کپک کہ اونا اوغانستان تون ہمو تاریخی و سوگو تعلقداری ءِ دُن کہ پاکستان نا ءِ و نئے دنیا ٹی پین ملک اسے اوغانستان اٹی امن، سوگوی و شونہالی نا داخہ در خواہش مریک ہراخہ در پاکستان ءِ ارے۔ اوپارے کہ پاکستان تدوک آ چل سال آن زیات وخت آن 30 لکھ آن زیات اوغان باہوٹ آتا میزبانی و اوغانستان نا پوسکن جوڑ جاڑ و اونا شونداری کن کلیدی کڑد ادا کننگ ءِ۔ اوغانستان نا تعمیر نو و اونا شونداری ٹی کمکاری کن پاکستان اسہ ارب امریکی ڈالر نا مالی وسیلہ غاتے ہم کاریم اٹ ایسونے۔ او اوغانستان پاکستان ایکشن پلان امن و ایلمی (اے پی اے پی پی ایس) نا اہمیت ءِ تالان کرسا پارے کہ ہڑتوم آ ملک آتا ہڑتوم آ کنڈآتا تعلقداری تے سوگو کننگ اٹ دا اہم ادارہ جاتی فریم ورک اسے۔ وزیر خارجہ اوغانستان اٹی امن و سوگوی کن دوئی کننگ کن مذاکرات نا بحالی نا ساڑی آ کوشست آتا ستاءِ کرے و اودے مثبت پیش رفت اس گوندسا پاکستان نا دا است خواہی نا درشانی ءِ کرے کہ امن عمل نا بھرم بین الاوغان جامع مذاکرات نا دروشم اس دوئی مریک۔ او خبڑدار کرے کہ داوخت آ ”شرپسند“ آتیان ہم ہوشیار مننگ نا گرج ءِ انتئے کہ اوفتا تینا فائدہ غاک ءُ۔ اوجہانی برادری آ زور شاغا کہ علاقائی و جہانی امنائی نا کمک اٹ اوغانستان اٹی پائیدار امن نا دا موقع ءِ دُوآن پیش تمنگ کن ہلنگپ۔ وزیر خارجہ ترک صدر رجب طیب اردوان تون ہم کانفرنس نا وخت آ اوڑدہی کرے۔ ہڑتوم آ ملک آتا نیام اٹ تاریخی خوشگوار تعلقداری تا درشانی ءِ کرسا وزیر خارجہ شاہ محمود قریشی حکومت و پاکستان نا الس نا کنڈآن ترک حکومت و الس کن پرجوش خیر سگالی نا جوزہ غاتا درشانی ءِ کرے۔ وزیر خارجہ شاہ محمود قریشی ترک وزیر خارجہ میولت کاواس اولوتون ہم اوڑدہی کرے۔ اوڑدہی ٹی ہڑتوم آ کنڈآن تین پہ تینی تعلقداری تے ودفنگ و خاص وڑاٹ معاشی تعلقداری تتون اوار تین پہ تینی فائدہ غاتا ایلو بشخ آتے ٹی مون آ ہِننگ نا است خواہی نا درشانی ءِ کننگا۔ کانفرنس نا وخت آ وزیر خارجہ مخدوم شاہ محمود قریشی سویلی و نیامی ایشیا کن قائم مقام نائب وزیر خارجہ ایلس جی ویلز تون ہم گونڈ ءُ اوڑدہی اس مس ہراٹی پاکستان، اوغانستان ہڑتوم آ کنڈآتا واپار نا بابت باندات آتیا گپ و تران کننگا۔
