اسلام آباد۔ 09 دسمبر (اے پی پی) وزیراعظم عمران خان پارینے کہ ساڑی حکومت سائنس و ٹیکنالوجی آ پبی چکار کیک، یونیورسٹی تیٹی سائنس و ٹیکنالوجی پارک جوڑ مریک، پاکستان ءِ علم آ مبنی زرگزران اٹی بدل کننگک، ورناتے کن سائنس و ٹیکنالوجی نا پڑاٹ پین وارخواہی ودی کننگک، چیلنج زند اٹی مون آ ہِننگ نا کسر فراوان کیک، بادشاہت نا نظام نا سوب آن مسلمانک پدی سلیسر، جمہوریت اٹی خاہوتی سیاست نا گنجائش اف، میرٹ نا بنداو آ خلقت بڑز ابریک و لیڈر نا ہم احتساب مریک۔ داخیال آتا درشانی ءِ او دوشنبے نادے آ نسٹ یونیورسٹی ٹی دود آن تران کرسا کرے۔ داوخت آ پاک فوج انا سروک جنرل قمر جاوید باجوہ، نسٹ انا ریکٹر لیفٹیننٹ جنرل نوید، بنجائی وزیر سائنس و ٹیکنالوجی فواد چوہدری ئسک ہم ساڑی ئسر۔ وزیراعظم پارے کہ ای اولیکو وار نسٹ آ بسونٹ وکنے کساس الوکہ کہ داڑے اخہ در جوان ءُ کاریم مننگ ءِ۔ اویونیورسٹی ٹی گچین تعلیمی چاگڑد و آسراتی آ یونیورسٹی انتظامیہ ءِ خراج تحسین پیش کرے۔ وزیراعظم پارے کہ ہر جوان انگا کاریم اسہ ویژن اسے آن بناکیک۔ اللہ تعالیٰ انسان ءِ اشرف المخلوقات جوڑ کرے و اودے بے پناہ واک تس۔ اوپارے کہ 60 انا دہائی ٹی پاکستان اسہ جوان ءُ دور اسے آن گدرینگاکہ۔ پاکستانی قوم اٹی اومیت، جوزہ و پت ئس و نن ترندی اٹ شونداری نا کنڈا روان ئس،ولدا ہمو دور بس ہراتم قوم اٹی خود اعتمادی و خودانحصاری چٹا و ہراتم قوم اس داوڑنا کیفیت نا گواچی مریک تو ایلو تا محتاج مریک۔ اوپارے کہ ہراتم ای اولیکو وار بھارت آ ہناٹ تو ہموڑے کنتون ہندن ءُ برتاؤ کننگا دُن کہ نن بھلو ملک اسے آن بسونن۔ بھارتی تیٹی احساس کمتری ئس وخت اس کہ ننا پت ئس۔ اوپارے کہ دانا سوب دا ئس کہ پاکستان اٹی میرٹ نا پالیسی نا کلچر ئس۔ بیورو کریسی دنیا نا گچین بیورو کریسی ئس۔ میرٹ نا بنداو آ خلقت بڑزا بسرہ۔ ننا ادارہ غاک سوگو ئسر دا دور اٹی پاکستان اٹی بھلو بھلو ڈٹ بناکرے ولے میرٹ نا نظام خراب مس تو پاکستان تینا لائخی تیان بھاز شیف ہنا۔ وزیراعظم نسٹ انا طالب علم آتے یات ترفے کہ او ملک انا غٹ آن بڑزکو یونیورسٹی ٹی تعلیم کننگ ءُ و دا لحاظ اٹ اوفتیا زمواری ہم ہنداخہ بھاز مریک۔ اوپارے کہ بدبختی اٹ تعلیم، تعلیم نا آب و خواندگی نا پڑاٹ نن بھاز پدی سلیسونن۔ وزیراعظم نسٹ اٹی سائنس اینڈ ٹیکنالوجی پارک انا قیام ءِ بھاز بھلو پیش رفت اس گوندسا پارے کہ ایلو یونیورسٹی تیٹی ہندن ءُ ہی ٹیکنالوجی پارک جوڑ کننگک۔ اوپارے کہ انسان انت کہ تغ اس خنک اوفتا تعبیر ممکن ءِ۔ اللہ تعالیٰ انسان ءِ بے پناہ لائخی تسنے ولے انسان ہمووخت سرسہبی دوئی کیک ہراتم تینا جندآن زیات سجفک و تینا ذات آن پیش تمسا مون آ ہنوک آ انسان بھلا انسان مریک۔ او طالب علم آتے پنت و شون کرے کہ او اگہ سرسہبی و زند اٹی گڑاس دوئی کننگ خوارہ تو مدام تینا است انا بنر، جنون بیرہ است اٹی ہی مریک۔ اگہ ٹیلنٹ و جنون نا مقابلہ مریک تو جنون اودے باایتک۔ اوپارے کہ شکست آن بایدے بندغ خلپ بلکن تمنگ آن پد بش مننگ آن نمے ٹی پین واک بریک۔ وزیراعظم پارے کہ دنیا ہزگار خلقت ءِ آخا بلکن ہمو بندغ آتے یات تخک ہراتینا پیسہ غاتے انسانیت کن خڑچ کیرہ۔ بل گیٹس اسہ بھلو انسان اسے انتئے کہ او تینا ذات انا زی آ بیرہ تینا گرج آتا رداٹ خڑچ کیک ایلو پیسہ غاتے انسانیت آ خڑچ کننگ ءِ۔ سرگنگارام تینا پیسہ غاتے اٹ لاہور اٹی ہسپتال اس جوڑ کرے۔ وزیراعظم پارے کہ خواجہ نبی کریم ﷺ نا زند و سیرت طیبہ ہر اسٹ کن مشعل راہ ءُ ہراہم خواجہ نبی کریم ﷺ نا نقش قدم تے اختیار کرے او دنیا ٹی سرسہبی و فتح دوئی کرے۔ خواجہ نا پاروک آ کسر آ چلینگسا مسلمانک 700 سال اسکان دنیا نا عظیم قوم ئسر، اینو ہم دنیا نا کیہی ملک آک ریاست مدینہ نا اصول آتیا چلینگ انگ ءُ۔ ہراہم دا اصول آتیا چلینگک او دنیا ٹی سرسہبی دوئی کیک۔ وزیراعظم پارے کہ بادشاہت نا نظام نا سوب آن مسلمانک پدی سلیسر وخت اس کہ جمہوریت نا نظام اختیار کروک آک بھاز مون آ پیش تمار انتئے کہ جمہوریت اٹی میرٹ و احتساب نا نظام مریک۔ جمہوریت اٹی لیڈرنا ہم احتساب مریک و میرٹ نا بنداو آ خلقت ءِ بڑزا اتنگک۔ وزیراعظم پارے کہ ننا ملک اٹی سیاسی جماعت آتا تہہ ٹی خاہوتی سیاست ءِ و ہندا بنداو آ خلقت مون آ بریرہ۔ اوسائنس و ٹیکنالوجی کن گچین خذمت آتیا نسٹ یونیورسٹی نا زموار آتے مبارکبادی تس و باوری کرفے کہ حکومت سائنس و ٹیکنالوجی پارک کن ہر وڑ کمک فراوان کیک۔ اوپارے کہ ننا حکومت ڈاکٹر عطاء الرحمان ءِ نالج اکانومی نا ٹاسک فورس انا سروک کرینے۔ ننے پاکستان ءِ نالج اکانومی ءِ بدل کروئی ءِ۔ وزیر اعظم پارے کہ مشکل حالیت آتیان پد ہم نن سائنس و ٹیکنالوجی نا بشخ آ خصوصی چکار کینہ۔ 4سال اسکان یات ترفسا کیوہ کہ مسکوہی حکمرانک ہراوڑنا پاکستان اس ہلاسر ہناسر تانکہ ننا دور اتون الس اونا موازنہ ءِ کننگ کے۔ وزیراعظم پارے کہ ساڑی حکومت سائنس و ٹیکنالوجی آ خصوصی چکار کننگ ءِ ومعاشی حالیت آک گچین مننگ تون اوار اوار بڑزکو تعلیم، آخبت نا ٹیکنالوجیز، ڈرون ٹیکنالوجیز آ پین چکار کینہ و ورناتے کن پین وارخواہی ودی کینہ و اوفتے پوسکن آ ٹیکنالوجی آن شُپ کینہ۔ وزیراعظم تعلیم آ خصوصی چکار کننگ آ پاک فوج انا سروک جنرل قمر جاوید باجوہ ءِ ہم خراج تحسین پیش کرے۔
