سرینگر ۔ 05 دسمبر (اے پی پی) مقبوضہ کشمیر اٹی پنچ شنبے نادے آ پدریسہ 123می دے آہم بھارتی فوجی گھیڑ و ایلو پابندی تا برجاسلنگ نا سوب آن دامان کشمیر و جموں و لداخ نا مسلم گیشتری علاقہ غاتے ٹی خوف و بھیم نا چاگڑد پدریسہ برجاءِ و خلقت اٹی بھاز غم و غصہ اس خننگک ۔ کشمیر میڈیا سروس نا رداٹ بھارتی فوجی تا بھلو کچ اسے نا تعیناتی آن بیدس دفعہ 144 نا رداٹ پابندی خلوک ءِ ۔ خاص وڑاٹ دامان کشمیر نا ہشت لکھ آن زیات خلقت ءِ پدریسہ لاک ڈاءون نا سوب آن بھاز مشکل آتون مون تروک ءِ ۔ مقبوضہ علاقہ ٹی انٹرنیٹ ، پری پیڈ موبائل فون و ایس ایم ایس سروس پدریسہ بند ءُ ۔ انٹرنیٹ سروس نا پدریسہ بند مننگ نا سوب آن خلقت نا نئے بیرہ تینا ایب و کیب بلکن مچ آ دنیا تون رابطہ بند مسنے ۔ داڑان پوریاگر، طالب علم و صحافیک بھاز بے وڑ زہمی مسنو ۔ دامان کشمیر اٹی خلقت سول نافرمانی نا تحریک نا رداٹ بھارت نا کشمیر مخالف گام گیج آتا برخلاف ناراضگی و چک وتاڑ ءِ برجاتخانو ۔ داوخت آ خلقت تینا کاروبار ءِ بند تخرہ و اسکول و دفترآتیان مر مریرہ ۔ سہب و شام بیرہ منہ گھنٹہ کن دوکانک ملنگرہ ۔ پبلک ٹرانسپورٹ ہم بھلو حد اسسکان معطل ءِ ، داڑے سول سوساءٹی نا تنظیم تا جہانی سیوت، سیوکس مانیٹر شاری آجوئی تا بابت درجہ بندی ٹی بھارت نا پوزیشن اٹی تنزلی کرینو ۔ سیوکس مانیٹر ’’الس نا واک آ جلہو‘‘ نا سرحال آن تینا رپورٹ اٹی مقبوضہ کشمیر اٹی انسانی حق انا علمبردار آتا برخلاف کریک ڈاءون، صحافی و سول سوساءٹی نا پڑک آتیا جلہو و مقبوضہ کشمیر اٹی پدریسہ لاک ڈاءون آ بھاز گڑتی نا درشانی ءِ کریر ۔ درجہ بندی ٹی تنزلی آن پاش مریک کہ اظہار رائے وپرامن برانز تون اوار جمہوری آجوئی تیٹی نمان وڑاٹ کمتی بسنے ۔
