لاہور۔ 01 دسمبر (اے پی پی) چیف جسٹس آف پاکستان جسٹس آصف سعید کھوسہ پارینے کہ راج انا مظلوم بندغ آتے گچین انصاف نا فراوانی بھاز بھلو عبادت اسے، دنیا ٹی انصاف کننگ، جنت ءِ کٹنگ نا بھاز ہی اڑزان ءُ سودا سے، اللہ تبارک و تعالیٰ ننے انصاف کننگ و امانت آتے خیانت آن بیدس پدی تننگ نا پرمان کیک، چیف جسٹس پارے کہ زوت ہی سپریم کورٹ اٹی زالبول جج آتے تعینات کننگک۔ او لاہور اٹی یک شنبے نادے آ پنجاب جوڈیشل اکیڈمی نا کنڈآن مسٹ میکو مسہ دے ئی ویمن ججز کانفرنس نا ایسری سیشن آن تران کریکہ۔ ایسری سیشن اٹی چیف جسٹس لاہور ہائی کورٹ سردار محمد شمیم خان، پندار چیف جسٹس لاہور ہائی کورٹ مامون رشید شیخ، جسٹس عائشہ اے ملک، جسٹس جواد حسن، جسٹس اسجد جاوید گورال، جسٹس ریٹائرڈ ناصرہ جاوید اقبال، کونسل جنرل امریکی ایمبیسی، رجسٹرار لاہور ہائی کورٹ عبدالستار، ڈی جی پنجاب جوڈیشل اکیڈمی و ڈی جی ڈسٹرکٹ جوڈیشری اشتر عباس ئسک بشخ ہلکر۔ چیف جسٹس آف پاکستان جسٹس آصف سعید کھوسہ پارے کہ راج اٹی زالبول نا کڑد ودسا ہِننگ ءِ۔ زالبول آک نرینہ غاتا غالب راج اٹی کاریم کننگ ءُ و داسہ ننے زند انا ہر بشخ اٹی زالبول آتے واکدار کروئی مریک۔ اوپارے کہ زالبول جج آک پیچیدہ مقدمہ غاتے ٹی کانودنارداٹ فیصلہ ترسا تینا لائخی تے منفینو، داسہ ننے ہم زالبول و نرینہ جج آتے ٹی پرخ ءِ چٹفوئی مریک۔ اوپارے کہ کمرہ عدالت اٹی جج آتا گچین رویہ غان مخلوق اوفتا شرف ءِ کیک، زالبول جج آک ذہنی دباؤ آن آجو مرسا تینا کاریم ءِ کیر۔ اوپارے کہ زالبول ججز کانفرنس نا اڈتننگ ننا غٹ اکن گمر نا سوب ءِ۔ اوپارے کہ سرسہب کانفرنس نا اڈتننگ آ جسٹس عائشہ ملک و اونا ٹیم مبارکباد نا حقدار ءِ۔ فاضل چیف جسٹس پارے کہ پاکستان اٹی صنفی امتیاز بناآن چلیگنسا بننگ ءِ، ملازمت آتیان ہلیس تعلیمی ادارہ غاتے ٹی کوٹہ اسکان ہر جاگہ غا صنفی امتیاز ساڑی مریک، زالبول آتے راج اٹی چندی وڑنا ویل آتا مون تروک ءِ میرات اٹی حق انا معاملہ مرے یا ہردے اُرائی بیدادی نا چرجوئی، زالبول آتا گیشتری دُن انگا ظلم آتا گواچی ءُ ننا آئین و چندی کانود زالبول آتے خاص حق ایترہ، ضابطہ فوجداری نا رداٹ نیاڑی دوبہ دار ءِ ضمانت ملنگ آسانی ساڑی ءِ۔ چیف جسٹس نا پاننگ ئس کہ ننے زالبول آتا حق انا رکھ ءِ کروئی ءِ، داکانفرنس لاہور ہائی کورٹ و جوڈیشل اکیڈمی نا اہم ءُ گام گیج اسے۔ دود انا ایسری آ پنجاب جوڈیشل اکیڈمی نا کنڈآن چیف جسٹس پاکستان، چیف جسٹس لاہورہائی کورٹ، جسٹس عائشہ اے ملک و کانفرنس نا منتظمین آتے شیلڈز پیش کننگا۔
