اسلام آباد۔ 01دسمبر (اے پی پی) قومی احتساب بیورو (نیب) راولپنڈی مچ آ ملک اٹی وڈی خوری نا منفی زہم تیان آگاہی نا بابت تینا خصوصی مہم اٹی چندی تنظیم، سول سوسائٹی و راج انا ایلو تپہ غاتے اوار کرینے۔ دیوان اٹی راج انا چندی تپہ غاتیان ملوک آ مثبت سلاہ تا رداٹ آگاہی و توننگ نا مہم آ تازہ انگا پیش رفت ناجاچ ءِ ہلنگا۔ نیب انا کنڈآن جاری پریس ریلیز نا رداٹ 2019ء ٹی نیب راولپنڈی ورناتیا چکار کرسا ”آگاہی و توننگ‘ کن اسہ اسیجا مہم اس چلیفے۔ دارداٹ نیب اسلام آباد، راولپنڈی، جہلم، چکوال و اٹک نا چندی یونیورسٹی، کالج و اسکول آتے ٹی وڈی خوری نا برخلاف جنگ انا سرحال آ سیمینار اس اڈ تس۔ نیب 20 ہزار کڑد سازی نا انجمن جوڑ کرینے ہرافتا کمک اٹ ورناتے تون تین پہ تینی رابطہ غاتے سوگو کرے و دا پلیٹ فارم نا کمک اٹ مقالہ غاتا نوشتہی، پوسٹرز سازی و مصوری نا مقابلہ اڈتننگا تانکہ وڈی خوری نا برخلاف جنگ اکن ورناتا تخلیقی لائخی تے کاریم اٹ اتنگ مرے۔ نیب راولپنڈی چیئرمین نیب(ر) جسٹس جاوید اقبال نا راہشونی ٹی تینا قومی فرض انا پوروی کن پرعزم ءِ۔ انسداد وڈی خوری مہم نا رداٹ بارانی یونیورسٹی تیان آگاہی لیکچر اڈتننگا ہراٹی نیب آرڈیننس 1999، نیب نا ویژن، مشن، آپریشنل وڑوڈول، نیب انا دنگ، وڈی خوری نا سوب و اونا منفی زہم و معاشی شونداری آ اثر آتا بارواٹی آگاہی تننگا و بشخ ہلوک آتے مشورہ تننگا کہ تینے ٹی او پرعزم، دیانت داری وخوداحتسابی نا عمل نا بناءِ کیر۔ دا لیکچر نا ایسر آ ڈائریکٹر آگاہی و توننگ نیب راولپنڈی عابد اللہ اعظم پارے کہ دیانت دار خلقت و ایماندار بندغ آک راج انا راہشونی ءِ کیرہ۔
