اسلام آباد ۔ 07 نومبر (اے پی پی) صدر مملکت ڈاکٹر عارف علوی پارینے کہ بھارت نا کنڈآن مقبوضہ جموں و کشمیر نا متنازعہ حیثیت ءِ بدل کننگ کن غیر کانودی، اسہ کنڈی گام گیج و شاری آجوئی ءِ معطل کننگ مقبوضہ دامان نا الس نا انسانی حق انا خلاف ورزی ءِ، جہانی برادری بھارت نا فاشٹ حکومت نا دوتے اٹ کشمیری الس نا مشکل آتا چٹفنگ کن بایدے تینا کڑد ءِ ادا کے ۔ اقتصادی فائدہ غاتیا اخلاقی اصول آتے بایدے قربان کننگپ ۔ داخیال آتا درشانی ءِ او پنچ شنبے نادے آ داڑے یورپین یونین ملٹری کمیٹی نا چیئرمین جنرل کلاڈیو گرازیانو تون گپ و تران کرسا کرے ہرا ایوان صدر اٹی اوڑتون اوڑدہی کرے ۔ صدر مملکت پارے کہ جہانی برادری بھارت نا فاشٹ حکومت نا دوتے اٹ کشمیری الس نا مشکل آتا چٹفنگ کن تینا بایدے کڑد ءِ ادا کے و اقتصادی فائدہ غاتیا اخلاقی اصول آتے قربان کننگپ ۔ یورپی یونین ملٹری کمیٹی نا چیئرمین پارے کہ یورپی یونین کشمیری الس نا انسانی حق انا پورو مخ تفی ءِ کیک ۔ صدر مملکت پارے کہ مقبوضہ کشمیر اٹی بھارت نا بربریت و انتہا پسندانہ پالیسی تیٹی زبردستی نقل مکانی مریک ۔ دا اسہ ہند ن ءُ ویل اسے ہرانا دے ٹکی نیامی نا بے چیٹ علاقہ غاتیان پناہ گزین آتا گدریفنگ آنبار یورپی یونین ءِ ہم داوڑنا ویل آتا مون تروک مسنے ۔ ہنداخاطران مقبوضہ کشمیر آن زبردستی نقل مکانی کون آ حالیت آتیان بچنگ کن غٹ تر کوشست آتے بایدے کننگے ۔ صدر مملکت پارے کہ پاکستان یورپی یونین تون تینا تعلقداری تے بھاز اہمیت ایتک و یورپی یونین پاکستان نا اسہ روایتی سیوتی و بھلا واپاری و زرکاری شریدار ءِ ۔ اوپارے کہ پاکستان تینا زرگزران نا گچینی کن جی ایس پی پلس اسکیم ءِ اسہ تعمیری رابطہ اس تکک ۔ جنرل کلاڈیو گرازیانو نا دورہ نا خیر مقدم ءِ کرسا صدر مملکت پارے کہ داڑان پاکستان و یورپی یونین نا نیام اٹ آخبت اٹی دفاعی کمکاریءِ مون آ دننگ اٹ کمک رسینگک ۔ اوپارے کہ پاکستان پوسکن آ یورپی پارلیمنٹ و یورپی کمیشن تون اواری اٹ کاریم کننگ نا خواہندار ءِ ۔ اوپاکستان و یورپی یونین نا نیام اٹ جمہوریت نا اسیجا قدر، تین پہ تینی مفاہمت و شرف نا بنداو آ برجا کمکاری نا ہم ذکر ءِ کرے و پارے کہ پاکستان تین پہ تینی مسخت آتے مون آ دننگ کن پرعزم ءِ ۔ صدر مملکت انتہاپسندی نا چٹفنگ و دہشت گردی نا برخلاف جنگ اٹی بے مثال جانی ، مالی و معاشی قربانی تا ہم ذکر ءِ کرے ۔
