مولانا فضل الرحمان نا دھرنہ نا مسخت کشمیر نا ویل آن جہانی برادری نا چکار ءِ اسہ کنڈ کننگ ناءِ

بنجائی وزیر امور کشمیر و گلگت بلتستان علی امین خان گنڈاپورنا ایسوسی ایشن آف ڈسپلیسڈ کشمیری جرنلسٹ نا ڈل اتون گپ و تران

اسلام آباد ۔ 07 نومبر (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ حکومت کشمیر نا ویل ءِ جہانی کہول آ پبی وڑاٹ تالان کرینے، وزیراعظم عمران خان پاکستان ءِ جہانی تنیائی آن نجات ترفینے، 5اگست نا بھارتی گام گیج غٹ کشمیری تے یکجا کرینے ہر ا آر ایس ایس و بی جے پی نا ہندو انتہا پسند فاشٹ ایجنڈا ءِ مچ آ دنیا ٹی بے نقاب کننگ ءِ ۔ بنجائی وزیر تون کشمیر سٹیٹیسٹک سنٹر و ایسوسی ایشن آف ڈسپلیسڈ کشمیری جرنلسٹ نا ڈل اوڑدہی کرے ۔ اوپارے کہ بھارت اٹی مسلمان تتون اوار غٹ اقلیت آتے نشانہ کننگ انگ ءِ ۔ اوپارے کہ کشمیر نا ویل آ جہانی سلاہ نامہ ترندی اٹ پاکستان نا حق اٹی مننگ ءِ ۔ اودنیا غا پیدوار کرے کہ کشمیری تے حق خودارادیت ترفنگ کن آخیریکو حد اسکان کانہ ۔ علی امین گنڈاپور پارے کہ کشمیر نا ویل انا ایسری کن اقوام متحدہ ءِ متحرک کڑد ادا کروئی مریک ۔ اوپارے کہ مولانا فضل الرحمان نا دھرنہ نا مسخت کشمیر نا ویل آن جہانی برادری نا چکار ءِ اسہ کنڈ کننگ نا ءِ ۔ علی امین گنڈاپور پارے کہ پیشن نا ملک آتے ٹی رہینگوک کشمیری کشمیر نا ویل ءِ جہانی کہول آ تالان کننگ اٹ اہم کڑد ادا کننگ کیرہ ۔ ڈل اٹی ساڑی مروک آک پاریر کہ 5اگست نا بھارتی گام گیج آن پد آن ننا مقبوضہ کشمیر تون رابطہ مفننگ ءِ، بھارت مقبوضہ کشمیر ءِ دنیا نا غٹ آن بھلا جیل جوڑ کرینے ۔ 5 اگست آن پد آن داوخت اسکان کم و ود 30 ہزار بندغ ءِ دزگیر کننگانے و مقبوضہ کشمیر اٹی اظہار رائے نا آجوئی پورو وڑاٹ چٹانے ۔