سرکار دوعالم نا ودی دے ءِ 10 نومبر آ مذہبی جوش وجوزہ و شان و شرف اٹ اڈتننگک

اسلام آباد ۔ 07 نومبر (اے پی پی) بنجائی دارالحکومت اسلام آباد و جاڑ انگا شار راولپنڈی ٹی خواجہ نبی پاک ﷺ نا ودی دے ءِ اڈتننگ کن تیاریک ترند مسنو ۔ سرکاری و نجی کہول آ سرکار دوعالم نا ودی دے ءِ یک شنبے 10 نومبر آ مذہبی جوش و جوزہ و شان و شرف اٹ اڈتننگک ۔ دا چرجوئی ٹی خلقت تینا اُرا، گلی و بازار تیٹی بتی لگفینو و محفل ذکر و نعت و میلا پاک ﷺ نا چرجوئی ہم برجاءِ ۔ مچ آ ملک اٹی غٹ چنکا بھلا شار، خلق آتے ٹی 12ربیع الاول آ عید میلادالنبی ﷺ نا جلوس اڈ ہلیک ۔ سرکاری کہول آ عید میلاد النبی ﷺ نا مرکزی دودانا چرجوئی ٹی جہانی رحمت اللعالمین کانفرس اس اڈ ہلیک ۔ ہرانا بنائی سیشن اٹی وزیراعظم عمران خان وخت اس کہ ایسری سیشن اٹی صدر مملکت ڈاکٹر عارف علوی مہمان خاص مریک ۔ اینخو سال جہانی سیرت کانفرنس نا سرحال ’’ریاست مدینہ و جدید اسلامی فلاحی مملکت نا تصور تعلیمات نبوی ﷺ نا روشنی ٹی‘‘ تخنگانے ۔ داسرحال آ یونیورسٹی، کالج و دینی مدرسہ غاتا اسکالر و عالم دین و مشاءخ آک پٹ وپولی مقالہ ، کتب سیرت و کتب نعت مقابلہ غاتے کن وزارت مذہبی امور آگدریفینو ۔ وزارت مذہبی امور 70 مقالات، کتب سیرت و نعت آتے مقابلہ کن گچین کرینے ۔ یک شنبے نادے 10 نومبر آ اسلام آباد اٹی مروک آ جہانی رحمت اللعالمین کانفرنس اٹی بشخ ہلنگ کن سعودی عرب، ایران، مصر، عمان ، عراق، تیونس و شام آن عالم دین و مشاءخ آتے بشخ ہلنگ کن سلہ خلنگانے ۔ داکان بیدس جامع الازہر نا وائس چانسلر ’عمان نا مفتی اعظم‘ مدینہ یونیورسٹی نا پروفیسرز و مسجد اقصیٰ نا خطیب ءِ کانفرنس اٹی بشخ ہلنگ کن خصوصی وڑاٹ سلہ خلنگانے ۔