اسلام آباد ۔ 07 نومبر (اے پی پی) پاکستان تحریک انصاف نا سینیٹر فیصل جاوید اومیت ظاہر کرینے کہ جمعیت علمائے اسلام (ف) تون سیاسی اختلاف آتے مذاکرات نا کمک اٹ مر کننگک و دھرنا زوت ہی پرامن وڑاٹ چٹک ۔ پنچ شنبے نادے آ اسہ نجی ٹیلی ویژن اسے تون گپ و تران کرسا اوپارے کہ پی ٹی آئی نا حکومت اپوزیشن نا دھرنا ءِ پرامن چٹفنگ خواہک و دا ویل ءِ منہ دے اٹی ایسر کننگک ۔ اوپارے کہ نن اسلام آباد اٹی دھرنا تروک آتا برخلاف چک و تاڑ کننگ خواپنہ و نئے خون خرابہ نا است خواہ اُن ۔ سینیٹر فیصل جاوید پارے کہ جاڑ انگا شار تا رہینگوک آک سخت مشکل آتون مون تننگ ءُ و اوفتے تینا کاریم تا جاگہ غا سرمننگ کن منٹ آتا سفر ءِ گھنٹہ ٹی طے کروئی تمنگ ءِ ولے او سلاہ پیش کرے کہ اپوزیشن نا جماعت آتے بایدے مرے کہ او بے چیٹی نا جاگہ غا ملک ءِ شون تننگ کن حکومت تون کمک کیر ۔ اوپارے کہ اپوزیشن مثبت کڑد بایدے ادا کے و قوم انا گچین فائدہ ٹی تینا سلاہ تے بایدے پیش کیر ۔ اوپارے کہ اپوزیشن جماعت آک بدبختی اٹ الس نا راجی آسراتی نا جاگہ غا تینا جند انا فائدہ غاتے کن سیاست کننگ ءُ ۔ اوپیدوار کرے کہ گچین مروک آ وزیراعظم نا استیفہ ممکن اف ۔ اوپارے کہ وزیراعظم عمران خان اسلام آباد انتظامیہ ءِ پارت کرینے کہ او برانز کروک آتے ہروڑنا ممکنہ آسراتی تا فراوانی ءِ المی کے ۔ اوپارے کہ نن برانز اٹی پیش بروک آ مشکل آتیان جوان وڑاٹ بلد اُن انتئے کہ ہراتم پی ٹی آئی حکومت نا برخلاف برانز کریسس تو ننے ہم ہنداوڑنا ویل آتون مون تروئی تماسس ۔
