اسلام آباد ۔ 07 نومبر (اے پی پی) کشمیر کمیٹی نا چیئرمین سید فخر امام اقوام متحدہ غازور شاغانے کہ اقوام متحدہ مودی حکومت آن مقبوضہ کشمیر اٹی کرفیو نا دمدستی چٹفنگ نا بایدے خواست ءِ کے ۔ پنچ شنبے نادے آ اسہ نجی ٹی وی چینل اسے تون گپ و تران کرسا اومقبوضہ کشمیر اٹی مسہ تُو آن زیات وخت آن پدریسہ جاری غیر انسانی کرفیو نا چٹفنگ و حریت راہشون تا دمدستی رہائی نا خواست کرے ۔ اوپارے کہ کودک کشمیری الس ءِ خور و دوائی تا کاختی نا مون تروک ءِ و کرفیو نا سوب آن مریض ہسپتال اسکان سرمننگ کپسہ ۔ اوپیدوار کرے کہ جہانی برادری مقبوضہ کشمیر اٹی بھارت نا غیر کانودی گام گیج آ بھارتی موقف ءِ سختی اٹ مسترد کننگ تون اوار اوار دا بابت پاکستان نا موقف نا پرزور تائید ءِ کرینے ۔ کشمیر کمیٹی نا چیئرمین انسانی حق انا کونسل آ زور شاغا کہ مقبوضہ دامان اٹی انسانی حق انا سنگین خلاف ورزی و مظلوم کشمیری تیا کروک بیدادی نا برخلاف گام گیج کے ۔ اوپارے کہ مقبوضہ کشمیر نا الس ہفت دہائی آن تینا حق خوداردایت کن ہُننگ ءُ ۔ اوپارے کہ مقبوضہ کشمیر اٹی تحریک آزادی نا پرامن جہد ءِ دہشت گردی و سیم انا ایپار آن دہشت گردی نا کارروائی تا بارواٹی بھارتی حکومت نا دروغ انا بیانک شرمناک ءُ ۔ اوپارے کہ وزیراعظم عمران خان اقوام متحدہ نا جنرل اسمبلی نا دیوان اٹی مقبوضہ کشمیر نا حقی حالیت آتیا متاثر کن تران کرے ہرانا جہانی کہول آ راہشونک ستاءِ کرینو ۔ سید فخر امام پارے کہ بھارت درملکی ڈل و تینا ہی سیاست دان تے مقبوضہ کشمیر نا دورہ نا موکل تفننگ ءِ تانکہ مقبوضہ کشمیر اٹی جاری بیدادی ءِ اودیم کننگ مرے ۔
