مزن وزیر عمران خان ءِ سروکی ءَ المی ایں چیز آنی نیاد آنی ھوالگ ءَ دیوان ءَ را گشتانک

اسلام آباد ۔ 6 نومبر (اے پی پی) مزن وزیر عمران خان ءَ پنت ءُُ شون کت کہ چیز آنی جم کنگ ءُُ ناجائز سیت گرگ ءِ ھلاسی ءِ واستہ انتظامی بندوبست آناں گیش جوان کنگ بیت، ھمروچگیں نیاد آنی بُرز ءُُ جھل بوھگ ءِ ھمک ھپتگی رپورٹ مزن وزیر کارگس ءَ را روان دیگ بہ بیت، سمگلنگ ءِ گر ءُُ دار ءِ واستہ سیم سر آئی انتظامی ءَ را گیش جوان کنگ بہ بیت، روگن ءِ نیاد آنی تہ ءَ کمی آرگ ءِ دل یکیمی کنگ بہ بیت، لس ھمروچگیں چیز آنی نیاد آناں گر ءُُ دار کنگ ءِ واستہ ھمک رنگ ءِ انتظامی ءُُ ایندگر انتظامی کنگ بہ بیت ۔ اے ھیالانی درشانی آئی ءَ ھمروچگیں چیز آنی ھوالگ ءَ برجم داشتگیں دیوان ءِ سروکی ءَ کنان ءَ کت ۔ دیوان ءَ وزیر برائے فوڈ سیکورٹی صاحبزادہ محبوب سلطان، وزیر برائے منصوبگ بندی مخدوم خسرو بختیار، وزیر ءِ وردن ءُُ وراک پنجاپ سمیع اللہ چوہدری، وزیر ءِ وردن ءُُ وراک خیبر پختونخوا حاجی قلندر لودھی، بنجاھی سیکرٹری نیسنل فوڈ سیکورٹی ڈاکٹر محمد ہاشم، صوبائی چیف سیکرٹریز ءُُ ایندگر کلانہ ایں اپسرگ آں بھر زوری کت ۔ دیوان ءَ سرج میں ملک ءَ ھمروچگیں وردنی چیز ، ھاسیں رنگ ءَ آرت، روگن، شکر ءُُ ایندگر چیز آنی استیں جاور ھال ءُُ اے چیز آنی نیاد آناں گر ءُُ دار کنگ ءِ واستہ گامگیج چست کنگ ءِ چار ءُُ تپاسی گرگ بوت ۔ صوبائی چیف سیکرٹریز ءِ نیمگ ءَ صوبگ آنی تہ ءَ آرت ءِ بوھگ ءُُ نیاد آنی ھوالگ ءَ مزن وزیر ءَ را بریفنگ دیگ بوت ۔ صوبائی چیف سیکرٹریز آنی نیمگ ءَ گوشگ بوت کہ حکومت ءِ نیمگ ءَ پاسکوذ امبار آں چہ گندم ءِ پجاری ءَ چہ گندم ءِ جاور ھال جوان اَنت ءُُ ملک ءِ اِچ دمگ ءَ گندم ءِ کمی نیست انت ۔ دیوان ءِ ساھت ءَ چیف کشمنر اسلام آباد ءَ جتائیں چیز آنی نیاد آنی بابت ءَ الس ءَ را سرپدی پجاری کنگ، آن لائن آرڈرز ءُُ اے چیز آنی الس ءِ گس ءَ تاں سر کنگ ءِ پجاری ءِ رد ءَ جوڑ کتگیں اپلیکیشن ’’درست دام‘‘ ءِ ھوالگ ءَ بریفنگ دات ۔ دیوان ءَ بنجاھی دارالحکومت ءَ استیں اے نظام ءَ را پنجاپ ءُُ خیبر پختونخوا ءِ ٹوھیں شہر آنی تہ ءَ بندات کنگ ءُُ خیبر پختوانخوا ءَ ایبٹ آباد، پشاور، مردان ءُُ ڈی آئی خان وھدیکہ پنجاپ ءَ راولپنڈی، ملتان ءُُ لاہور ءَ اے نظام ءَ را زوتیں رنگ ءَ ساڑا کنگ ءِ پیسلہ ھم کنگ بوت ۔ اے موہ ءِ سر ءَ مزن وزیر عمران خان ءَ پنت ءُُ شون کت کہ ورنی چیز آنی امبار جوڑ کنوک ءُُ ناجائز سیت گروگ ءِ واستہ انتظامی گامگیج ءَ را گیش جوان کنگ بہ بیت ۔ دیوان ءَ پیسلہ کنگ بوت کہ ھمک تحصیل ءَ کشت ءُُ کشاری کنوک آناں حکومت ءِ نیمگ ءَ چہ جاھ دیگ بیت ھما جاھ ءَ آ ابید دگہ فیس یا ھر چ ءُُ درچ کنگ ءَ چہ دان آں بھا کت بکن اَنت ۔ مزن وزیر ءَ پنت ءُُ شون کت کہ صوبائی انتظامی ءِ نیمگ ناجائز سیت گرگ ءُُ امبار جوڑ کنگ ءِ ھلاپ ءَ جوانیں گامگیج آنی گوما ھمک ضلع ءِ شہری ءُُ کوچگی تحصیل آنی تہ ءَ چیز آنی امبار آں چیر دیگ ءَ چہ سامان آنی نیاد ءِ جھل ءُُ بُرزی ءِ ھمک ھپتگی رپوٹ ھم مزن وزیر کارگس ءَ را راوان دیگ بہ بیت تانکہ نیاد آنی سر ءَ چار ءُُ تپاس گرگ بہ بیت ۔ مزن وزیر ءَ پنت ءُُ شون کت کہ منڈی ءُُ مارکیٹ ءَ نیاد آنی پرک ءَ را کم کنگ ءِ واستہ ٹیکنالوجی ءَ را کارمرد کنگ بہ بیت ءُُ اے پرک ءَ را سہرا کنگ بہ بیت ۔ مزن وزیر ءَ گوشت کہ اے ریاست ءِ زمہ واری انت کہ ھمک شہری آناں ھمروچگیں ورن ءُُ وراک ءِ پجاری ءَ را دل یکیمی کنگ بہ بیت، اے رد ءَ ھمک رنگ ءِ گامگیج کنگ بہ بیت تانکہ اچ کس شُد لاپ مہ وپ ایت ۔