پاکستان سوءٹزرلینڈ تون واپار، زرگزران ، کشت وکشار و ٹیکنالوجی نا بشخ آتے ٹی کمکاریءِ مون آ دننگ نا خواہندار ءِ، اسد قیصر

اسلام آباد ۔ 06نومبر (اے پی پی) پاکستان نا دورہ غا بروک آ سوءٹزر لینڈ نا پارلیمانی ڈل پارینے کہ او کشمیر نا ویل انا اقوام متحدہ نا قرارداد آتا رداٹ ایسر کننگ نا خواہندار ءُ، دنیا ءِ مقبوضہ کشمیر اٹی انسانی حق انا سنگین خلاف ورزی تیا تینا توار ءِ بڑز کننگ نا گرج ءِ، وخت اس کہ اسپیکر قومی اسمبلی اس قیصر پارے کہ ساڑی حکومت سوءٹزرلینڈ تون اوار غٹ سنگت ملک آتا آزموندہ غاتیان فائدہ ہرفسا سیل و سوات و کشت وکشار تون اوار زرگزران نا گچینی کن گام گیج کننگ کن پرعزم ءِ ، جہانی برادری کشمیر نا ویل ءِ تالان کننگ نا بابت تینا کڑد ءِ ادا کے ۔ سوءٹزرلینڈ نا پارلیمانی ڈل چارشنبے نادے آ پارلیمنٹ ہاءوس اٹی اسپیکر قومی اسمبلی اسد قیصر تون اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا اہم معاملہ غاتیا گپ و تران کننگا ۔ قومی اسمبلی سیکرٹریٹ آن جاری مروک آ بیان نا رداٹ داوخت آ اسپیکر قومی اسمبلی پارے کہ پاکستان سوءٹزر لینڈ تون تینا 70 سالہ دوستانہ تعلقداری تے بھاز قدر انا نظر اٹ ہرک، پاکستان سوءٹزر لینڈ تون واپار ، زرگزران ، کشت وکشار و ٹیکنالوجی نا بشخ آتے ٹی کمکاری ءِ مون آ دننگ نا خواہندار ءِ ، اوپارے کہ پاکستان نا زیات ر علاقہ قدرتی حسن آن مالامال ءُ و ہموڑے سیل و سوات نا بے شمار وارخواہی ساڑی ءِ ، ساڑی حکومت سیل و سوات و ایگریکلچر ءِ مون آدننگ آ خصوصی چکار کننگ ءِ، اوپارے کہ پاکستان نا ساڑی حکومت زرگزران نا گچینی کن دوست ملک آتا آزموندہ غاتیان فائدہ ہرفنگ خواہک ۔ اسپیکر قومی اسمبلی پارے کہ پارلیمانی کہول آ ڈل آتا ہن و بر آن ہڑتوم آ ملک آتا پارلیمنٹ نا باسک آتا آزموندہ غاتے ٹی ودکی مریک ، برصغیر نا تقسیم اٹی کشمیر اسہ ایسر نا چاری ویل اسے دادے ایسر کننگ آن بیدس ڈیہہ ٹی امن مننگ کپک ۔ اوپارے کہ بھارت نا 5 اگست نا گام گیج آن پد مقبوضہ جموں وکشمیر ءِ کشمیری الس کن دنیا نا غٹ آن بھلا جیل جوڑ کرینے ، نام نہاد جمہوریت نا دعویدار بھارت مقبوضہ کشمیر اٹی انسانی حق انا سنگین خلاف ورزی کرینے ۔ سوئس ڈل انا سروک داوخت آ پارے کہ سوءٹزر لینڈ مقبوضہ کشمیر اٹی جاری انسانی حق انا سنگین خلاف ورزی تیا توار بڑز کیک ۔ اوپارے کہ سوءٹزر لینڈ کشمیر نا ویل ءِ اقوام متحدہ نا قراردادآتا رداٹ ایسر نا خواہش مند ءِ ، دنیا ءِ مقبوضہ کشمیر اٹی انسانی حق انا سنگین خلاف ورزی تیا تینا توار ءِ بڑز کننگ نا گرج ءِ ۔ اوپارے کہ سوءٹزر لینڈ پاکستان تون تینا تعلقداری تے بے کچ اہمیت ایتک، سوءٹزرلینڈ پاکستان نا واپار و کشت و کشار نا بشخ اٹی کمکار ی ءِ مون آ دننگ نا خواہندار ءِ ۔ اوپارے کہ سوءٹزرلینڈ پاکستان نا ساڑی حکومت تون تینا تعلقداری تے پین ودفنگ خواہک ۔