بنجائی وزیر سائنس و ٹیکنالوجی چوہدری فواد حسین نا نجی ٹی وی چینل تون گپ و تران

اسلام آباد ۔ 06نومبر (اے پی پی) بنجائی وزیر سائنس و ٹیکنالوجی چوہدری فواد حسین پارینے کہ ملک اٹی بے چیٹی تالان کننگ کن مولانا فضل الرحمان نا کوپہ ءِ کاریم اٹ اتوک آتے مایوسی مس، پی ٹی آئی حکومت برانز نا پرامن ایسراس خواہک ، ہنداسوب ءِ کہ حکومت برانز کروک آتون پرامن مذاکرات کننگ ءِ تانکہ اوفتے پرامن وڑاٹ تینا اُراتیا رادہ کننگ مرے ۔ قوم زوت جوان ءُ خبر اس بنک ۔ اسہ نجی ٹی وی چینل اسے تون گپ وتران کرسا بنجائی وزیر پارے کہ پی ٹی آئی نا حکومت وزیراعظم عمران خان نا نرم دل کماشی ٹی اپوزیشن تون مذاکرات کن درگہ غاتے ملانے ولے اوفتے ملک اٹی بے چیٹی نا موکل تفننگک ۔ عمران خان نا حکومت جے یو آئی (ف) انا برانز نا بشخ ہلوک آتے ہروڑنا ممکنہ آسراتی فراوان کننگ ءِ و وزیراعظم نا پارت آ مارچ انا بشخ ہلوک آتے کن ہچ ءُ ویل اس ودی کننگتنے ۔ اوپارے کہ بنجائی شونداری ادارہ سی ڈی اے پِر آن پد یخ انا شدت اٹی ودکی نا سوب آن اوفتے کن درکار گرج انا گڑاتا فراوانی ءِ المی کننگ ءِ ۔ چوہدری فواد حسین پارے کہ ملک اٹی بے چیٹی تالان کننگ کن مولانا فضل الرحمان نا کوپہ ءِ کاریم اٹ اتوک آتے مایوسی مس انتئے کہ حکومت برانز ءِ توپننگ نا فیصلہ کرے ۔